美國人氣劇集《逃》（PrisonBreak）第二季大結局啱啱喺美國播完，雖然第三季未開拍，但已經有內地網站大字標題率先披露劇情。馮仁昭噚日睇到新浪網引述《華西都市報》嘅報道，話第三季《逃》會改名做《入獄》（PrisonIn），暫定喺今年8月29號推出，由於上季男主角Michael（威和夫米拿飾）同佢哥哥Lincoln逃獄之後，收視跌咗，所以新一季決定再安排兩兄弟做逃獄威龍。
Lincoln有女友
報道話新一季故事講到Michael同特工Alex以及前獄長Bellick齊齊入咗巴拿馬監獄之後，聯手策劃逃獄，而Lincoln就搵番之前跌咗落水嘅500萬美金做逃獄基金，然後入獄救細佬，劇情聽落都幾精采吸引。
另外報道仲話有關嘅預告係嚟自《逃》劇嘅官方網站，但馮仁昭摷勻都搵唔到，好懷疑劇情嘅真實性有幾高；至於《逃》劇監製喺官方網站度，就只係話新一季會喺今年秋季推出，到時劇情會更暴力同殘忍，另外仲會安排一個新女角，做Lincoln女朋友咁話。