內地鴨仔團嚟香港俾黑店鋸到一頸血，好彩有中央台主持公道，踢爆奸商賣偽劣假貨，中央領導人都會喺7.1嚟香港慶祝回歸10周年，港府一向好似無良導遊老點旅客入黑店咁，例牌安排領導人參觀樣辦家庭模範戶，呢啲假親民行程，梗feel唔到、睇唔到真實民情啦，八方搵老友幫領導人度咗個「慶回歸精華遊」，包保好玩，唔會貨不對辦。
旅行除咗食得招積，住得舒適，見識吓當地平民生活可能仲過癮，社區組織協會主任何喜華好恨做嚮導，「領導人一定要嚟深水埗，呢度有獨一無二嘅板間房同籠屋，有真人表演踩汽水罐同搶紙皮，仲有煲呔搞到一鑊泡嘅西九爛地。」溫總成日去煤礦、工地，同貧苦工人同枱食餃子，去籠屋實啱佢口味。
唔好錯過7.1遊行
議員張文光話做領導最緊要認清歷史，嚟香港梗要惡補六四事件，最好幫襯支聯會買啲紀念品同六四歷史書做手信，包保係堅嘢，無篡改過嘅。另一個必去地方係維園硬地足球場，皆因嗰度每年都有燭光集會，又係7.1大遊行起步點，堪稱香港民主聖地，「若果日頭唔方便，夜晚偷偷哋去睇吓都好㗎。」
張文光又建議上山頂。個個自由行都去，好「行」喎！佢話上去唔係睇風景，「唔係叫佢睇乜，而係想問佢睇到乜。家吓空氣污染咁嚴重，佢哋上去睇到個真相，睇怕都要叫啲商家佬諗計，還返個藍天畀我哋。」
7.1下晝有大遊行，領導人扮忙，以前滾水淥腳上午就鬆人，遊行搞手李卓人話，胡溫與其去商場「胡混」，不如出嚟行街，「商場好易俾人暗算，加上又要封路又要落閘，認真勞民傷財，不如一齊出嚟行，我拍心口保證冇人敢埋身。溫總03年錯過咗7.1遊行，今次補番數囉。」香港人幾like胡溫，若然佢哋上街，過百萬人一齊行都唔奇。
行程搞掂，住宿好多選擇，鍾意威嘅，可以考慮瞓兩晚君臨天下；膳食方面，香港地大把好嘢食，唯一要注意嘅係，超人請食飯時要睇吓有冇油魚，佢話一向寫清楚，唔會呃人。