熟男藝人時興老牛吃嫩草，45歲的已婚影帝黃秋生更加嗒開有癮。近日他被爆搭上23歲索女模JessieCheung，結果上周出席電影活動攞獎時，罕見謝妻「睇住頭家」，希望借此平息緋聞。豈料秋生轉頭已不安於室，前晚在銅鑼灣夜會一名貌似朱慧敏的年輕女伴撐枱腳歎意菜，然後再到灣仔蒲吧兩粒鐘，其後兩人更在車廂纏綿，秋生被女方箍頸啜嘴，親密關係非比尋常。
黃秋生與太太吳惠貞結婚多年，並育有兩名分別11歲和8歲的囝囝，但其緋聞依然成籮。繼年前與25歲內地女星范冰冰傳緋聞，以及近期被拍得與23歲女模JessieCheung依偎睇拳賽並拖手遊台灣後，愛蒲愛玩的秋生前晚繼續風流快活，與一名貌似與梁榮忠車震的港姐朱慧敏之年輕女子，二人冒雨夜會後，更於凌晨時分上演一幕激情的車廂啜嘴。
撐枱腳大啖意菜
前晚秋生在灣仔會展出席主演電影《寄生人》的首映禮，於9時多便獨自離場，坐的士抵達恩平道daDomenico餐廳，下車後他站在街頭木無表情地講了5分鐘電話，隨即進食肆坐到角落一枱，會合已在場等候的一男一女歎意菜。
將近11時，秋生等人埋單離開，同行男性友人一馬當先推門而出，四處張望後，秋生才與貌似朱慧敏的女伴步離餐廳。現場所見，該女伴留有一把長直髮，身形纖瘦，雙腿修長，身穿紅衫、紅鞋及牛仔褲，打扮斯文但略帶娘味。雙手插袋的秋生起初稍為避忌，同樣左顧右盼，但過馬路時見男友人識趣彈開，墮後的秋生即與「娘版朱慧敏」冒雨並肩而行，三人在街頭登上一輛灰藍色的平治跑車，由男友人開車駛至灣仔謝斐道的中國網絡大廈停車場，再往頂樓的明星蒲點Gossip51消遣。
偏愛高䠷長髮女
秋生和娘版朱慧敏到場後即入VIP房閉門狂歡，蒲足兩小時後，才由一直同行兼把風的男友人掩護返停車場。由於所坐的平治跑車車廂狹窄，秋生先讓娘版朱慧敏竄進後座，才放低前排椅背，自行登上司機位旁乘客位，此時娘版朱慧敏突傾前身體，一手箍實秋生頸項，男方即扭身回頭，看來女方正餵他吃糖果，而兩人四目交投下竟激情啜嘴，在旁睇戲的男友人更忍不住偷笑。駕車離開停車場後，娘版朱慧敏未幾便在鵝頸橋附近下車，秋生則由男性友人送返大坑寓所。
屢有媾女前科的秋生，上周二出席香港特區10周年電影選舉奪取最佳男主角時，曾罕有地公開答謝髮妻吳惠貞，他說：「多謝我太太，幫我睇住頭家，令我可以好自由發揮我嘅創作。」揚言為避狗仔隊而搬離妻兒獨居的秋生，這邊廂答謝老婆，那邊廂果然繼續自由照蒲照媾女，轉軚快過打針。不過觀乎其緋聞女友，由范冰冰、JessieCheung以至娘版朱慧敏，均擁長直黑髮、高䠷纖瘦和筷子腳的特徵，看來他對這類型靚女的確情有獨鍾。
此外，秋生偕娘版朱慧敏連踩兩場前，曾在《寄》片首映上對港產片衰落發表偉論說：「𠵱家啲港產片真係好快落畫，不過好彩呢套戲嘅poster好有西片感覺，都唔明點解港產片啲poster可以咁肉酸。」他又透露稍後會執導電影《我愛你》，及跟鄭中基合演喜劇《十面埋伏》。
採訪、攝影：娛樂突發組、陳順禎、卓美娟
最高蘋嬸
黃秋生呢頭多謝老婆，嗰頭攬女親熱，佢咁好戲，唔怪得之演《無間道》出色到攞獎，原來佢真係無間道嚟㗎！
蘋果娛樂特派評述員蘋嬸
