歐陽妙芝年幼時，母親不幸逝世，令她更加珍惜親情。妙芝一年多前為丈夫方時俊（Steven）誕下兒子方玉丞（Achille），由於沒有長輩教導她如何做母親，只得慢慢摸索。如今Achille精靈乖巧，正代表妙芝教子有方，在她享受天倫樂之時，妙芝最大的遺憾就是亡母未能感受弄孫之樂。 撰文：比華利
名模歐陽妙芝04年與圈外男友方時俊結婚，享受了一年的二人世界後，妙芝便為丈夫誕下兒子方玉丞，從此變成三人行。妙芝榮升母親，責任重大了，凡事都為兒子着想，故她一有空便會陪Achille，享受親子樂。
獨力湊BB
妙芝10歲那年母親不幸患上腦膜炎，其母由發病到離世，前後不到兩星期，39歲便被無情病魔奪去性命。當時妙芝一家人接受不了這個事實，更成為妙芝的遺憾，她說：「我好記得媽咪嘅遺容，佢對眼有淚光。冇咗媽咪嘅日子，阿爸要養起頭家，我哋四姊弟要學習獨立生活，最初好唔慣，我仲成日偷偷喊。」
自幼失去母愛，令妙芝下定決心要好好守護子女，她不介意付出比別人多：「我要將最好嘅都畀晒囝囝，因為我由懷孕到生Achille，身邊都冇媽咪照顧，其間其實好踢腳，一來冇老人家傳授經驗，二來我乜嘢都要親力親為，相比身邊嘅朋友，好似琦琦同李嘉慧，佢哋湊BB都有老人家幫手，當然比我輕鬆，不過我唔怕辛苦。」只要見到Achille的笑靨，就算再辛苦100倍，妙芝都認為值得。
對鏡頭敏感
1歲多的Achille性格開朗，更不會輕易流淚，妙芝說：「記得老公第一眼見到囝囝，佢第一句就同BB講：『男仔要堅強啲，唔可以喊。』有一次BB喺屋企玩，佢俾架玩具車整傷腳趾流血，但一啲都冇喊，又冇出聲，我忽然諗番老公嗰句話，好擔心佢三歲定八十，太硬頸同自尊心太強，乜都死撐，將來有乜事，都死忍唔講出嚟。」
Achille生於半個藝人之家，妙芝擔心過度曝光會影響兒子成長，她說：「娛樂圈係萬花筒，囝囝𠵱家未懂事，佢對乜嘢都好奇，我唔鼓勵佢成日到公開場合，當大家焦點都放喺佢身上時，好容易令佢產生優越感，以為自己與別不同，而且我認同小朋友要有童真，乜嘢表情都要發自內心，唔可以強迫佢哋要對鏡頭做笑臉。」妙芝指早前為雜誌拍照時，帶着Achille到場，他看到影樓的相機，竟然喧賓奪主，霸佔了妙芝的拍照位置，妙芝說：「嗰啲係我嘅工作，佢點可以成日霸住做主角！」
攝影：陳慧安
本欄逢周六刊出
