小記唔「建議」大家多飲可樂，不過講到可樂公司推廣的產品，又的確幾吸引。早排搞換食玩，有晒雪櫃、7-11食物，相當精緻好玩有特色，結果一朝早換晒。想要？家下要畀高價買了。食玩之後有乜？下星期四（12日）起有今年炒番熱嘅手塚系列×可樂。呢個系列，其實係日版，早排喺日本換過。香港呢？曾經喺香港嘅拍賣網出現過，一套賣$160，為起都要賣十幾蚊一隻。唔算貴，不過已經售完。
今次可以自己換，香港同樣有齊12款Q版匙扣，包括《小飛俠阿童木》、《怪醫黑傑克》、《小白獅》、《藍寶石王子》，造型Q到爆，4月12日起至5月9日，於OK便利店購買任何口味可樂500毫升膠樽裝2支加$10，即可換購一套（有2款）。嗱，個包裝面就有畫明係邊款公仔嘅，不過售貨員畀邊款你就似乎無得揀喎！除咗匙扣，仲有襟章。凡於推廣期內購買22oz或32oz「自己Fill」汽水兩杯，獲贈一套4款的可樂×手塚治虫襟章兩個。不過計我話，日版匙扣吸引好多。
查詢熱線：22103388
