王晶的帽子戲法，N年前已玩得出神入化。儘管他這位多產電影人屢被批鬥，被指拍爛片摧毀影壇生態，但曾幾何時，他揮動魔術棒，創造出周星馳經典笑片、《賭神》、《精裝追女仔》和《最佳損友》、以及三級艷情系列等電影文化。時至今日，依然值得大家午夜翻煲無限次，說他一味商業零貢獻，未免言重。
別人笑我太瘋癲，我笑他人看不穿。你有你踩，我有我態度的王晶還是越爬越高，今天任職漢傳媒執行董事兼董事總經理的他既有本事做高層，自然夠膽論盡紅星。王晶敢評周潤發演技10年沒進步，鄭伊健難溝通，惟獨天才加暴君的周星馳演技第一，成為他心中最愛演員排名topone。 撰文：朱倬誼
王晶集編劇、導演、監製、策劃兼演員於一身，入行30多年來，經他掂過的影視作品超過200部。自80年代中期開始，王晶成為影壇搶手貨，雖然他商業，但確曾帶起港產片新文化，加上電影票房勁，又捧紅很多演員。原來在他心目中，還有一個演員排名榜，坐在觀塘新製作室內的王晶數着手指說：「我覺得周星馳演技最好，排名第一位就係周星馳，第二係秦沛、第三黃秋生、第四陳道明、第五係周潤發。」
曾開創港產片四大文化的王晶，親述每項文化的代表演員，長話短說但敢言抵死，大家齊看王晶逐個數之餘，也必定勾起不少電影回憶：
周星馳──天才與暴君
喜劇文化（王晶代表作：執導兩集《鹿鼎記》及《整蠱專家》）
王晶：「我最愛係周星馳，佢縱有一千個不是，一萬個不該，仍然係我覺得最好演技嘅演員。喺30秒之內可以吸引全場注意力，邊個有咁嘅魅力？周潤發都冇，蠟起頭做賭神就有，喺《西遊記第一百零一回之月光寶盒》入面，周星馳攞照妖鏡照到莫文蔚係白骨精嗰幕，3秒幾可以換6個表情，香港冇第二個做到咁嘅水平，內地冇，華人冇，拍完嗰時已經覺得佢真係得！到後來再睇番碟，佢真係做到！呢個仆街真係好嘢！周星馳係天才又係暴君，喺片場生人勿近。演喜劇好難可以肯定到邊個動作會令人笑，因為一唔笑就係零分。」
周潤發──演技冇進步
賭片風雲（王晶代表作：執導《賭神》及《賭俠》系列）
王晶：「我同佢差唔多同年出道，開頭見佢，知道佢必紅，都冇估錯。佢喺電影界混咗6年冇紅到，係票房毒藥，到咗《英雄本色》後，佢一路都好好，86至96年係佢黃金期，但近期睇佢嘅《滿城盡帶黃金甲》，佢由95、96年到𠵱家嘅演技冇進步到，保持水平，佢本來喺我心中排名榜排第三，𠵱家第五啦。周潤發享受生活多過電影，所以佢快樂㗎，得閒影吓相。其實好似踢波咁，都冇人同佢踢，唔比賽啫。你都可以話我10年冇進步，我唔係做緊呢樣嘢，做咗第二樣之嘛，以前跑100公尺，跑10,000公尺咪退步咗囉。」
舒淇──冇偷偷電我
三級寶鑑（王晶代表作：執導《強姦》及《玉蒲團》系列）
「當年我睇雜誌，見到舒淇嘅一張相就簽佢返嚟，佢拍《玉蒲團》時好靚，仲好叻㖭，我夠膽講佢係一個非常睇得通嘅人。當時嗰幾年，冇見過女演員唔偷偷電我，佢一下都冇，與眾不同。我哋好錫佢，拍第一部戲後，佢第二部有少少脫，再脫就嘥咗佢，我哋仲將佢以前拍落好多麻麻煩煩嘅片買番，嗰時算係為電影界做件好事，但陸陸續續有手尾，仲有台灣黑社會㖭，但都同佢搞番掂，佢都知嘅。
「舒淇係一個好堅強嘅女仔，以前佢未出名時拍裸照，佢阿媽都冇事，到忽然間全世界都識佢，佢阿媽有壓力，過年唔敢去拜年，舒淇話『阿媽我陪你』，跟住逐家逐戶拜年，拜一個圈返嚟後，冇一個人唔話呢個女仔堅強！佢係知自己應該做乜嘢事嘅女仔，又係極少唔扭計嘅台灣女仔。」
鄭伊健──冇人溝通到
江湖風雨（王晶代表作：出品《古惑仔》系列》）
「佢96年拍《古惑仔》紅，當時我簽佢5部戲，因為睇到佢會紅，但唔知幾時紅。嗰時一年捧佢開4部都唔紅，有少少灰心，真係唔得咩？拍埋呢部用埋佢啦，《古惑仔》就紅啦。鄭伊健一路唔係我嘅人，只不過係TVB人，後來佢簽咗林珊珊做經理人，我覺得佢諗法好自我，成日會覺得害佢，冇人同佢溝通到，包括林珊珊。佢成日話古惑仔破壞形象，唔係古惑仔你又有乜嘢影響吖？當時佢紅係因為佢似漫畫人，成績係比預期中有輕微意外，當年佢唔夠水平，咁多年嚟都冇改變過喎，佢係一個40歲嘅細路仔。」