小甜甜逝世，巨星殞落，全球同悲！
小甜甜係香港E個「亞洲國際城市」嘅品牌，因為佢仲有錢過英女皇，香港人以為受過英女皇殖民地統治就好巴閉，妄自菲薄，英女皇有乜咁大把，小甜甜靠地產發達，有水過英女皇，係中華婦女嘅光輝，吐氣揚眉，真係帶俾炎黃子孫好大嘅自豪感！
最難得嘅就係，小甜甜雖然名震歐西，喺倫敦巴黎掃貨掃到出晒名，但佢一D都唔忘本，除咗時時紥一條喜氣洋洋嘅孖辮，仲一身紅卜卜嘅農村唐裝，充滿溫州特色，心境又長期保持七歲小女孩嘅天真無邪，睇見佢，好似見到一幅中國年畫咁，回饋社會。帶俾港人好多歡笑！
除咗喺服裝方面，高度愛國，小甜甜同佢先夫王德輝先生，一世人極度知慳識儉，跌咗一條頭髮，都好隆重咁，用放大鏡搵番，執起佢，放喺條手巾仔裏面，E一樣節儉嘅美德，夠值得下一代學習喇！
喺E個人慾橫流嘅浪費社會，人人追求物質享受，因大花筒碌卡，貪慕虛榮，而碌到要坐錢債監嘅窮鬼，不知凡幾，小甜甜夫婦嘅樸素、務實、節儉，令人長相追憶！
上趟話，開發大西北──話啫──煲呔領導富商團考察，小甜甜都有份，仲喺烏魯咩齊，同D維族俊男大跳民族舞，在鼓聲之中，小甜甜對孖辮，在風中飛揚，飛吓飛吓，跟住佢話會投資大西北開礦喎，講吓講吓，估唔到咁快就人天永隔Lu，真係惆悵！
小甜甜，請你安息吧！