偉大嘅毛主席講過「婦女能頂半邊天」，香港人鍾意叫啲婦女做師奶，佢哋比美國嘅靚太更唔易做，其中出名悲情嘅天水圍師奶就最難撈，頂天頂到一殼眼淚，但辛苦極都唔會冧落嚟。為咗表揚呢班師奶嘅硬淨精神，職工盟前排出咗本《天水圍12師奶》，實行幫「悲情城市」洗底。
賣6800本淨賺17萬
本書出街之後反應好到不得了，5個月賣咗6,800本，初步埋單淨賺17萬，破晒政團出書嘅紀錄，師奶market原來好好搵，認真唔可以睇少！呢本冇豪華包裝、冇雕花排版、冇彩色插圖嘅書仔，因乜解究咁賣得呢？作者陳惜姿以前係記者，家吓喺中大教書，本書賺錢唔關佢事，皆因佢一毫子都唔收，兼且貼埋車錢去學校開講座搞宣傳，「好多校長一次過買幾十本派畀老師，呢啲大客對銷量好有幫助。另外有唔少人睇完之後四圍都話啲師奶經歷夠真實，絕對唔係樣板假show，所以好有共鳴，咪買書支持佢哋囉！」
陳惜姿同八方講，嗰啲平時唔識民間疾苦嘅官員，睇咗呢本師奶經之後即刻有反應。元朗民政專員仲拿拿臨刮晒12個師奶出嚟傾偈，除咗有求必應，仲應承借間荒廢校舍嘅地畀佢哋開榨油廠，聽講遲啲會整啲有機花生油、花生醬同花生糖出嚟賣，若果呢壇嘢搞得起，到時超市除咗獅球嘜、刀嘜，仲有「天（水圍）嘜」花生油，等啲老闆慢慢揀。「煲呔成日話要扶貧，睇怕佢都要買番本嚟睇啦，唔係佢點知啲冇權冇勢嘅老闆想要乜呀？」
李卓人好書贈煲呔
職工盟嘅李卓人就話會貼錢送本書畀煲呔做賀禮，「我怕煲呔忙得滯冇時間買，若果佢睇咗呢本書，實知道用10蚊點買餸啦，書裏面有modelanswer㗎。查實佢應該訂番一百幾十本派畀啲官，問我哋攞貨有折頭喎。」
李卓人好書贈煲呔
成功男人背後要有靠得住嘅女人，天水圍師奶背後就有大把唔上進嘅「衰佬」，佢哋唔搵工、包二奶、打老婆，甚至偷錢走佬。但凡事都要持平，職工盟會唔會出番本《天水圍12好佬》畀男人平反呢？人哥話暫時未有咁嘅計劃，不過一直都收集緊民間故事，遲啲可能又有新搞作。