王晶由昔日小編劇，躍身成為今日做殼王陳國強旗下漢傳媒的高層；他由電視跳到電影，又由電影跳回電視，不停炮製商業作品。正當一眾香港導演恨攞國際電影獎，期望提升地位時，王晶卻表示零興趣，並以一派睬你都儍的態度說：「好儍囉，人哋想要廉價勞工，唔好搞寸人哋party，好賞識你班人？你就想呀！你會唔會欣賞印度導演吖？」
內地育英才
人人諗計躋身國際影壇，王晶卻一盆冷水兜頭淋：「冇意義，我覺得一個人喺外地，要成為人哋覺得好犀利嘅文化人，唔係咁容易嘅事，同人哋文化有距離，跟住仲要好唔容易融入人哋嘅社會，如果一定要去，要有一個限期。你係得嘅，大紅花轎抬你過去啦。」
「我好後生時，90幾人去見OliverStone（奧利華史東），見佢時佢話『ThisguyspeaksEnglish！』，咁之前嗰幾條友梗係講得好差啦，佢話我哋會點點，助手話拍部戲300幾萬美金，但我拍好多囉喎，港產片都3、400萬美金啦，使乜拍你呢啲呀？佢都唔識點答。我𠵱家準備60幾歲退休，返內地住，希望可以教書、教編劇、教電影。」
斥有人擦鞋
王晶知道背後有人指他拍商業片影響影壇生態，但他嗤之以鼻，王晶說：「有好多人擦鞋擦到爆晒缸，對某啲人某啲事啦，佢哋踩人踩到扁、騷都唔騷人。80年代時，我同所有人講：『杜琪峯好好嘢！』冇人信，時至今日咪信囉。『劉偉強好好嘢，馬偉豪唔錯㗎！』啲人話『唔得！』，又話『鄭伊健點做大佬？』全部我用囉！好多嘢至事後孔明，一陣仲以為自己好有judgement（判斷力），猛話人哋唔好，你又有幾大貢獻？如果咁弊呀，今日你唔會訪問我，去訪問蔡楓華啦。」