近年過住清閒生活嘅周慧敏（Vivian），雖然有名係慳妹，但都有鬆手嘅時候。上周六晚8點半左右，佢同女傭現身中環威靈頓街一間名為Aerosoles嘅鞋舖。當晚Vivian身穿一件白色衫襯牛仔褲，化咗個淡妝，個樣有啲攰，同一般女士興奮掃貨嘅狀態好唔同。
呢個美國品牌主要係賣一啲OL款式嘅高踭鞋，可能購物對於女人嚟講真係能醫百病，一臉倦容嘅Vivian，行行吓見到櫥窗display一對價值859蚊嘅卡其色高踭鞋，即刻醒神咗啲，似乎好有興趣，睇咗一陣之後，終於忍唔住同女傭入舖頭試鞋。
耐心等待
由於當時鞋舖入面好多客人，所以貴為明星嘅Vivian都要等咗一陣先有售貨員招呼佢，但係佢都好有耐性咁等。Vivian喺舖頭逗留咗半個鐘，試咗兩對鞋，最後佢就買咗嗰兩對鞋走。出門口嗰陣，仲由女傭代勞幫佢拎住一袋戰利品，之後就齊齊搭的士離開。
