兩年一度嘅聖法蘭度慈善帆船賽（SanFernandoRace），噚日出發由香港去菲律賓，醫學界立法會議員郭家麒有份參賽，佢同隊友艘船叫「妾侍」（TipsyFree），全男班出海，佢話係向太太攞正牌「娶」嘅。呢項賽事最強參賽者係「紅色商人」陳永棋堂細佬陳永燊阿Sam，陳永棋幫阿爺出手向林伯頂咗亞視嚟做，坐咗幾年艇，另一愛國家族查氏肯接火棒佢先有望甩身，估唔到家族中人仲坐緊艇。
郭家麒同隊友一行12個男人丟低老婆同「妾侍」遠走高飛，全華人船員個個都好巴閉吓，包括郭家麒及謝鴻興等六個醫生，浸會大學體育系助理教授雷雄德，又有以出位言論見稱嘅主任裁判官練錦鴻，船長係律師陳念良。
「行到邊屙到邊」
郭家麒話由於帆船地方有限，全男班出海有好處，「大、小便都方便啲，唔係歧視女性。」陳念良話現任香港私家醫院聯會會長嘅劉國霖有獨門「方便」秘訣，「佢會綁個尿袋喺褲管，自己袋住啲尿，或者駁條長膠管出褲腳，屙尿唔使除褲，只要伸隻腳出船外面就搞掂，行到邊屙到邊。」
一班麻甩佬同「妾侍」出海纏綿，阿Sam卻志在必得，佢老父係深受北京尊重嘅政協陳瑞球，佢自己係家族上市公司長江製衣同YGM貿易要員，但佢鍾意出海多過從政，係本地帆船頂尖好手，亦係聖法蘭度帆船賽紀錄保持者，最快唔使50個鐘頭就衝線。今年佢有備而來，舊年買定隻新船「飛快52號」（FfreeFire52），希望刷新自己隊嘅紀錄。
八方問阿Sam新船幾錢，佢細細聲話唔好咁揚，俾老婆知道鬧死佢，睇嚟玩船嘅男人都怕老婆。八方搵料，嘩！原來佢艘TP52型帆船屬世界級賽艇，出廠價過百萬美金，即係成千萬港紙。一般帆船百零二百萬有交易，阿Sam認真揼本。雖然佢落重本，不過噚日臨出閘竟然脫腳，發現船艙入水要緊急維修。阿Sam同八方講，玩帆船最緊要準備充足，今次冇做足檢查，實在係反面教材。
阿Sam成船人搶修隻船，以為要延遲起步被迫讓賽啦，點知噚日朝早維港無風無浪，全部參賽帆船唔郁得，大會決定改喺石澳做起點，並延遲開賽時間90分鐘，啱啱夠時間畀「飛快52號」搶修出發，真係天無絕人之路。