香港馬王「爪皇凌雨」揚威杜拜，贏咗二千四百米嘅司馬經典賽，當日本馬/大熱門「搖滾樂」冇到，香港馬迷無不拍爛手掌。馬主周咁就贏咗三百萬美元獎金，羨慕死其他馬主，呢匹「沙彪」後裔可惜已經閹咗，失去配種價值，以後不如專攻獎金豐厚嘅賽事，去日本，杜拜，澳洲跑一級大賽。
香港人喺上周末好多節目，星期六跑完馬或者睇完七人欖球，返到屋企就睇「利物浦」大戰「阿仙奴」，跟住「曼聯」對「布力般」，兩場波夠晒精采，睇到拍爛手掌；到咗十二點午夜，收看杜拜賽馬直播，睇世界一級名駒決戰。香港「爪皇凌雨」與日本「賞月」分別輕易取勝，歐洲馬冇得跑；跟住第三場泥地二千米「世界盃」賽，美國馬「攻擊手」擊敗美國馬「金桶名釀」，第三名竟然係第一次跑泥地嘅香港「牛精福星」，於是左丁山中咗三重彩。好易揀啫，美國馬係著名泥地種，兩隻要晒，加「牛精福星」與大熱門「醒目貓」，四隻穿勻，而大熱門死火，三重彩順利到手。「醒目貓」馬主與「攻擊手」馬主都係姓「麥通」嘅酋長兄弟，邊個贏獎金，冇計啦。
原來外地啲馬主好嚴，唔似香港啲馬主咁成日俾人點。「攻擊手」騎師係十九歲嘅巴拿馬人FernandoJara，「攻擊手」入到直路開始發力時，騎師向後望咗兩三秒，睇邊隻馬跟喺後面。馬主SheikHamdan領獎後歡喜到極，不忘批評騎師：「有乜好望呀，我好唔鍾意，策馬向前就係向前衝，望後面冇用㗎！」呢位「咸丹」酋長可能會下次換騎師噃，除非佢聽練馬師勸啦。香港啲騎師入到直路後領先幾個馬位時，好興向後望幾次，唔見有人鬧。杜拜麥通酋長養馬集團係世界上最大嘅馬主，甚麼天皇騎師都要乖乖地聽話。
「攻擊手」跑泥地咁巴閉，追番源頭，原來呢隻係阿根廷配種馬，喺烏拉圭四出四勝，立即俾咸丹酋長買咗，運去美國跑，未輸過。呢隻阿根廷馬咁巴閉，點解本地馬主從阿根廷輸入嘅一級馬（贏過阿國一級大賽），冇邊匹似樣呢？唔通香港馬主出手低？還是中間人冇眼光選馬？香港人啲錢怕幾易搵也！