最近勁開24小時嘅老麥，成為潮人新蒲點！漢堡包好食、E神扮廚神夠靚仔？錯晒！加分在24小時，好多PSP、NDS機迷，竟然可以三九唔識七，上網邀約或純粹搭枱喺度聚腳對戰：「呢期最Hit係打《MonsterHunterPortable2》（MHP），多人連線打寶、打怪都勁啲……點解揀老麥？平民消費（甚至有時冇消費！）、冇人趕、冇龜揼（警察）！總有一間喺左近！」世界幾時變得咁冇隔膜？年輕人何來變得咁識溝通？
記者︰陸俊雄
攝影︰陳盛臣、陳陶鈞、伍慶泉
凌晨3點！銅鑼灣羅素街麥記阿富汗話：「其實都唔想打咁夜，你估唔使返工返學咩？不過有時都會唔小心打到天光……！」
揀麥記有感情
隨街亂入連Game，基本NDS、PSP都有玩，不過暫時都係以PSP嘅《MonsterHunterPortable2》最Hit，所以佢哋都會自稱為「獵人族」；點解唔去K房揀麥記？黃大仙獵人阿新話：「大家都食麥記大，樓下就有、冇人趕、可以淨飲唔會雙計。」女獵人嘉嘉搭嘴：「一班人打機唔係咩壞事，好見得光。撞正阿媽買至尊漢堡，咪Say個Hi。」
約打機似媾女？
好多人心裏面，都好易將機迷同隱蔽青年劃上等號；深夜11點幾，撞到MHP獵人Ted喺旺角樓上Cafe開局，佢解釋MHP係殺龍嘅PSP遊戲，可透過X-Link上互聯網，4人合力完成任務，但隊友間只靠文字溝通：「始終面對面連線玩先夠Fun！我問你？同女拍拖，你想齋傾電話定約出嚟吖？」一直以嚟樓上Cafe可以話係機友JoinGame嘅主場，最近老麥開通頂，收費仲平民、更聚𡃁仔客，馬上成為新開Game熱點。
獵人Gossip
獵人打機，其實都係正常社交活動，當中有咩奇聞趣談？4位油尖旺獵人報料，兼案件重演！
阿富汗：打交KickOff
有個高Level獵人，扮勁話落嚟幫人升級，但有人唔抵得佢咁囂，話同佢隻揪，跟手拎隻Winning出嚟，原來以波解決。
阿新：趁機挑逗
有人挑逗我呀！有次同隔籬枱女仔玩NDS，玩玩吓佢用腳掃我腳瓜。不過哥仔你副咁嘅尊容，真係好難信服喎！
Cafe殺龍竇
有人愛麥記開揚，亦有人愛上樓Cafe自有天地，旺角先施大廈就有Cafe以殺龍旗幟作招徠。親身到場，發現廿多位獵人，其中一枱有7個，由第一代打到今日熟到透，十足私人派對。除咗打機，仲約埋燒嘢食，打機做埋朋友，聽聽佢哋點講。
冇其他Game好似MHP可以打咁耐，又多人玩，我試過由下晝2點打到夜晚11點。
新年試過連打兩日冇返屋企，屋企人去旅行，都係呢班機友陪我。
最高紀錄通頂啫！打開都係呢班，我比較少WalkIn周圍玩。
手提遊戲In&Out
想落場撩Game打，一定要知時下獵人心態，同有乜潮Game啱連線打，免得出麥記打機時，俾人笑淨係識拎住部PSP同NDS，連吹咩Game風都唔知就冇面啦！
PSP
GundamSeedPortable
行貨今日出街，試玩版早就網上流傳，唔鼓勵玩ISO，但早就有人玩係事實。可4人連線，高達迷從此少落機舖交學費。
戰狼300
電影拍得太型，連帶遊戲都好買，但玩家評為典型美國邊行邊打Game冇驚喜。
WinningEleven10
玩正版10比9行得快，但同ISO比都係慢，對戰又要對區碼，總之超煩。
鐵拳
譽為PSP中最好的格鬥Game，可惜GundamSeed出現，鐵拳即刻拜拜。
NDS
孖寶賽車
出咗一段日子，但魅力不減，最多可以8人連線，受歡迎程度，NDS中稱王。
三國志大戰DS
好多人因為佢而出機，一隻玩卡布陣講戰術嘅遊戲，你見人打直部機玩時，就知玩緊佢。
WinningElevenDS
出冇耐就跌價，畫質差強人意，Fans大失所望，有辱同系列名聲。
JUMP終極明星大亂鬥
將《少年JUMP》入面40部作品角色抄埋一碟；大堆頭但欠誠意囉！
