當個個都以為意甲中只有國際米蘭一枝獨秀，其實沉寂多年嘅拉素亦都打出咗99/00年賽季稱霸意甲之後最好嘅成績！聽晚呢支已經喺聯賽連贏7場嘅意甲「老3」，將會喺主場出擊，迎戰正陷降班漩渦嘅墨西拿，無論狀態抑或近況，拉素都贏晒，1.95倍「主勝」捧得過之餘，佢哋仲隨時又大炒對手，1.8倍入球「大」有買趁手！
賴恩
國際米蘭今季喺意大利，甚至成個歐洲球壇可以話威到盡，聯賽連贏17場嘅紀錄真係唔到你唔服，不過論班費或者名聲，拉素同「國米」冇得媲美，不過呢支首都球會近期紅到發紫嘅勝績，絕對不下於「國米」；而且最令人意外嘅係佢哋嘅入球能力，近3場入10球，平均每場3.3個入球嘅驚人表現，更勝近期成日贏1球起兩球止嘅「國米」。所以就算唔理對手入球能力，淨睇「3.3球」呢個數字都已經夠開「大」。
墨西拿作客冇料到
拉素佳績全因將士用命所致，除咗首席射手洛基「弗」到爆之外，彭廸夫同埋比哈美都一樣咁掂，試問又有幾多支球隊能擋其鋒？有，「米蘭雙雄」或者同市宿敵羅馬可以，但聽晚佢哋對手只係聯賽排名18名，正要努力搶分護級、連輸兩場兼且攻守都弱嘅墨西拿！最慘嘅係墨西拿今季作客至今未曾一勝，如果諗住「扒冷」真係要諗清諗楚，始終拉素質高，又有主場之利兼力爭下季歐聯直接參賽資格，鬥志當然高好多。
保頓人齊斬草除「根」
至於冷選方面，筆者就推介保頓作客韋根有力開W，所以「讓球」平手盤玩得過。韋根上季就以「奇兵」表現殺出血路，不過今季佢哋好快就打回原形，而且隨住護級分子接連報捷，搞到韋根有被捲入降班漩渦嘅迹象。
雖然話保頓表現冇季初咁標青，不過前鋒安歷卡嘅殺傷力依然咁強，加上又有傷癒復出嘅奇雲戴維斯，韋根呢舖就算有主場優勢都好危。
投資特攻隊金句
「拉素勢勇攻力又強，試問有正選門將卡利安里停賽嘅墨西拿可以點頂？呢場波拉素主場出擊隨時又會大手交易，入球『大』必捧！」