人去樓空咗都有好一段時間嘅古蹟中環域多利監獄同中環警署，喺復活節「重生」，噚日起再搞藝術展。搞手之一區議員甘乃威同八方講，域多利監獄「復活」不易，佢哋10幾日前收場時，建築物四周圍發晒霉一陣宿味，牆身又漏水，要緊急執漏。佢話既然政府決定保留呢個古蹟，應該畀啲錢保養，否則擺多幾年，古蹟越來越殘舊，想保留都唔得。
免費派入場券
另一搞手藝術公社董事梁兆基建議政府設立基金，畀啲團體申請喺古蹟搞社區活動，有啲人氣唔使浪費古蹟。佢話由九巴創辦人雷亮後人捐出嘅古蹟雷生春，未公開開放，保養維修平均一個月都要五皮嘢，與其丟空佢，不如資助NGO借用，一家便宜兩家着。上述藝術展有多個本地藝術家參加，為期9日，入場券免費派發，可致電68289303查詢。