龔如心膝下猶虛，但有幾名契仔契女，其中一名契女是船王趙從衍二子趙世曾與影星姚煒所生的女兒趙式芝。這段低調的關係緣於擔任華懋非執行董事的趙世曾，因為趙世曾和龔如心感情要好，趙式芝一出世即契給龔如心。
現年28歲的趙式芝昨日在中環一間髮型屋接受訪問，原本以墨鏡遮掩紅腫雙眼的她，一看到《蘋果》頭版的契媽照片，頓時失聲痛哭，嗚咽着說：「你哋呢張相真係揀得好好，我就係想見到佢永遠都咁開心……噚日聽到契媽過身嘅消息，我初時完全唔相信，覺得係有人惡作劇，消化咗知道係事實後，我成個人震晒，唔知自己做緊乜，好傷心、好難過，我真係好心痛。」
大半年前飯敍有說有笑
趙式芝透露最後一次見契媽是在大半年前，「通常每年我都會同埋爹哋、細佬（趙式浩）去契媽屋企食一、兩次飯，母親節雖然我多數同媽咪過，但每年都會send卡畀佢。上一次見契媽，係喺佢公司嘅會所，同佢公司嘅董事、同埋爹哋一齊食飯，當時佢精神唔錯，仲有講有笑，真係諗唔到，佢咁快就會唔喺度。」
趙式芝說每一次見面，契媽都會送上燦爛笑容和深情擁抱，「佢好sweet，對我好親切，從來都冇見過佢惡嘅樣，我好錫佢、好尊敬佢，亦好仰慕佢，佢係一個非常傳奇嘅人物，一個女人統領咁大間公司，令到公司咁多年keep住有咁好嘅業績，真係唔容易。」
回想和龔如心相處時間最長的一次，是由倫敦回港在飛機上度過的十多個小時，當年仍在英國曼徹斯特大學修讀建築系的趙式芝，在希斯路機場內的名店Harrods遇上正在購物的龔如心，「當我上前sayhi，佢即時大力咁擁抱我，嗰日我坐經濟位，佢坐頭等，飛機一起飛，我就走去頭等機艙搵佢，坐喺佢隔籬個空位傾偈，當時空姐重走埋嚟問我攞登機證睇，我話我同契媽一齊㗎，就咁坐咗喺度賴死。十幾個鐘嘅機程，我哋傾咗好耐，閒話家常，當然大部份時間都係瞓覺啦。我記得佢不停咁叫我食雪糕、食糖，契媽最鍾意食甜食，尤其係冰皮月餅，不過為咗身體，佢又唔敢食咁多。我想講，我真係好掛住佢……」
記者 張止寒