時間
03年6月19日
地點
深井豪景花園
人物
蔡楓華
經過
亞視準備喺紅館舉行「麗的亞視半世紀精彩演唱會」，諗住搵蔡楓華做其中一位嘉賓，唱番佢有份主演嘅麗的劇集《IQ成熟時》主題曲。不過蔡楓華呢幾年行為怪異飄忽，亞視搵佢做騷，制唔過。
講到蔡楓華嘅怪行，最經典嘅莫過於03年6月嗰陣，佢喺自己住緊嘅深井豪景花園屋企樓梯隨處小便，搞到臭氣熏天，神憎鬼厭，結果鄰居打電話去報館投訴。
當年班街坊話蔡楓華自從屋企個廁所塞咗之後，一直唔肯畀錢維修，仲話每朝早7點幾都會見到蔡楓華攞住盒紙巾，行去大廈停車場嘅洗手間方便，不過好多時蔡楓華就咁喺屋企出面嘅樓梯搞掂。後嚟隔籬鄰舍向大廈管理處投訴，但都奈佢唔何，惟有喺梯間貼張告示出嚟，提醒住客唔好喺度小便。
當年蔡楓華唇紅齒白，係唔少少女心目中嘅白馬王子，可惜當年因為一句「剎那光輝唔代表永恆」，搞到事業跌落谷底，真係令人大歎可惜！
本欄逢周一至周六刊出
