【本報訊】華懋集團主席龔如心不敵癌魔，在養和醫院留院數天後，本周二離世。當時同在養和留院醫治肛門生瘡的賭王何鴻燊昨日出院，並向傳媒大談對龔如心逝世的感受，更指有人對他說，龔如心一生慳儉，嫌醫療費用昂貴而「有病唔睇醫生」；又說她患癌三年，卻遲在爭產官司勝訴後才求診，結果發現是末期卵巢癌，欲救無從。龔如心的私人助理迅速作出澄清，否認她因慳儉延誤治療。 記者：顏英儀 趙燕婷
何鴻燊因肛門附近生瘡在養和留院七日，昨晚康復出院，他在三太太陳婉珍、與二太太所生女兒何超鳳及主診醫生陪同下，在養和召開記者會交代病情，逾百記者出席。他否認患大腸癌，強調因肛門生瘡入院。
病後初癒的何鴻燊顯得有點疲累，聲線也不及以前般響亮。當記者問他對好友龔如心病逝感受，何鴻燊即時眉頭一皺，然後一臉嚴肅說，「我同小甜甜（龔如心）都算係老友，佢對我好客氣，識佢兩公婆幾十年。佢死之前仍然係地產建設商會董事，佢兩公婆做地產認第二，冇人敢認第一。」
擔任香港地產建設商會會長多年的何鴻燊說：「佢哋唔單止勤力，仲成日踎喺新界，一有機會就買番多少（地皮）。好可惜佢兩公婆太慳儉，唔捨得使錢，故此我捐錢唔會搵佢哋，佢哋睇到個錢咁大，做好朋友算數啦！」
「佢病咗三年 冇睇過醫生」
何鴻燊又一口氣地說，「呢次戥佢好可惜！不過，唔知真唔真，我得番嚟嘅消息就話，佢一向好慳儉，有病唔睇醫生，嫌睇醫生貴，唔使睇！呢個病佢病咗三年，冇睇過醫生，最近攞到400幾億（指與家翁王廷歆的逾300億元爭產官司），開心過頭，有錢就睇醫生啦！點知第一次睇，醫生就同孖辮（龔如心暱稱）講，睇怕呢次都好大問題，畀個壞消息佢，話佢係第四期，係卵子癌（卵巢癌），呢個癌散咗去個肺個腎個肝，乜都有齊，百分百末期，醫生話如果唔相信就去美國睇，美國史丹福專家一睇，都係一樣講嗰番說話。佢太尾期先睇，唔使睇！四個月啦，開心埋四個月啦！」
何鴻燊又大讚龔如心是地產界人才：「佢兩公婆都咁叻，其實龔如心啲英文叻過佢老公，乜嘢工務局嘅信都係佢寫嘅。」不過，何鴻燊秘書Janet突然中止他的說話，又指記者會已經結束，然後便帶同何鴻燊離開。
龔如心私人助理王禮泉昨晚接受記者查詢時，否認龔如心「有病唔睇醫生」。王表示，一般人有病都會向醫生求診，況且龔如心的弟妹也是醫生，龔如果有病隨時可以向弟妹查詢，所以他對何鴻燊的說法不敢置信。
另外，去年12月開始有報道指龔如心確診患癌，養和醫院消息人士向本報表示，龔如心自上月初沒有上班後，一直留在家中休養，及至數日前才入住該院，「佢都已經冇得做手術，又足不出戶，一直無離開過病房，所以淨係得佢嘅主診醫生去到病房先會見到佢。」
龔如心病情 一個月急轉直下
在不足一個月內，龔如心由上班時的精神奕奕轉為入院後的足不出戶，病情可謂急轉直下。據悉，龔如心的家人對其病逝頗感突然，之前也無特別準備龔的身後事安排。
龔如心生前親信、華懋售樓部總經理吳崇武昨日向本報表示，治喪委員會名單尚未擬定，又稱暫不清楚喪禮的安排詳情。王禮泉昨日也現身養和醫院，但他說到醫院只為個人脊椎舊患覆診，與龔如心的喪事無關。他說現仍與龔的家人商討喪禮安排，相信復活節假期後有分曉。
記者昨日全日在養和醫院守候，仍未見有殯儀館職員及龔的其他親友出現，相信其遺體仍停放醫院內。
