美國第二大航空公司聯合航空（UnitedAirlines）呢排發生工潮，代表3萬員工嘅5個工會不滿公司人工低、人手不足；批評高層人員薪金太高，仲要求公司准許低薪職員分享管理層嘅人工。事件引起網民議論紛紛，qwerti喺《MSN討論區》話：「聯合航空幾年前破產時，員工被迫減薪，同公司共度時艱；公司去年初擺脫破產保護後，管理層獲大幅加薪，行政總裁蒂爾頓舊年總薪酬高達3970萬美元（約3.1億港元），低層職員人工就冇乜加，好唔公平。」
Phil5185講：「聯合航空5名高層行政人員薪金的確好高，但就算加薪1倍，對公司嘅財政影響有限，只佔公司總薪酬1.7%；至於3萬名工會成員嘅薪金，就佔公司總薪酬高達98.3%，如果加薪1倍，公司肯定會破產。」
聯合航空辯稱，向管理層提供嘅股票獎勵計劃獲破產法庭批准；公司舊年擺脫破產保護後，已向一般職員發放總值超過15億美元嘅股份，而行政人員未能享受呢種福利，所以公司對低層職員唔係太差。