桂林街115號舊樓的建築格式幾有趣，有中空的樓梯，上落不覺得悶熱，比起所謂豪宅的密封型樓梯討好。豪宅住客似乎不介意被剝奪上落樓梯的權利，還以為這是豪客專利。有位親戚家住小西灣，出入有指定升降機直接送到府上，中間不停層，假如想落樓下十八樓C座搵朋友，得先落去地面向管理員說明層數，由管理員「分配」另一部電梯。手續這樣麻煩，管理公司自然有他的理據，一切都是為住客保安着想。但我覺得出入都要被升降機限制，被管理員「老點」，住客像綿羊乖乖被趕入閘，完全講唔通，令人周身唔舒服。
舊樓雖然樓梯光猛通爽，但可以想像，下雨時上落都會濕身，黃暴時更要擔遮上落樓梯。這座舊樓還有開放式欄河，最方便貓兒跳躍。可是假如搬來住，三歲人阿仔肯定當欄河是攀爬遊樂場，跑上天台設法爬上去搞天線，我們很可能要把他套上狗繩，防止四出搗亂險象環生。所以我想，住在這樣的舊樓，孩子一係先天實力堅強，攀爬彈跳都無事。大人忙着搵食無王管，孩子能理性自保不去犯險，要比其他同輩定性懂事。我是在深水埗長大的，算是定性與怕死的混合類型，雖然通街跑，但識惜身。阿仔不似我，跟大隊遊街睇舊建築時老是橫衝直撞，老爸在後尾窮追拖手也給小蠻牛甩開。阿仔太「勇」了，能力所限，暫時未能在深水埗的江湖行走，唯有上兵頭花園睇馬騮。