航科通信（1185）在2月中停牌，搞咗接近兩個月，到噚日先至復牌。呢間公司好多人憧憬會有優質資產注入，結果一如市場所料，航通獲母公司注資，而且包括風力發電機在內嘅資產，但就並非單純環保業務，仲有其他雜項資產，而且要股東供股集資，噚日股價開出嚟表現麻麻，收市更加倒跌5%。
業務發展冇重點
根據公告，航通會以9億元收購一籃子業務，包括汽車發動機管理系統及配件製造、車身密封系統製造、電梯用發電機製造、風電設備及可再生能源項目，代價以1.3億元現金及22億股新股支付，每股發行價0.35元。以呢批資產全年純利約9620萬元計，注入嘅PE大約9.3倍，睇落不過不失。
公司已發行股數10億股，呢批新股份將大幅攤薄現有股東權益，但由於公司盈利基礎低，06年中期仍錄得虧損，故此無盈利攤薄效應，反而因新資產有盈利而得益。至於現金代價部份，由於公司無乜錢，故此要10供4籌資支付，供股價都係0.35元，較停牌前大幅折讓逾50%。
航通之前已經投資風力發電，故此注入相關資產唔會太過意外，反而係汽車發動機同車身封密系統、電梯業務就比較令人摸不着頭腦，因為母公司中航總，如果想系內公司業務清晰化，應該將汽車相關資產注入有造汽車嘅中航科工（2357），電梯相關資產則畀有造大廈鋁製品及不銹鋼產品嘅中航技術（232），𠵱家炒埋一碟注入航通，完全唔知佢想點。
其實航通以往咁多年業績乏善足陳，主要原因都係缺乏一個發展重點，太過多元化，假如投資此股會覺得無所適從。