現年41歲的艷星陳雅倫去年和已婚的吳鎮宇傳緋聞後，桃花依然旺盛，但星途繼續插水。昨日凌晨陳雅倫現身養和醫院睇急症，竟分別獲兩名中坑各自駕駛約130萬的保時捷漏夜接送，雖然近日有傳她被飛出彭順新片，無緣色誘男角郭富城，不過她大可留力，轉軚招呼兩名波子男。
緋聞多多的陳雅倫，去年被拍得與已婚的吳鎮宇在夜店親熱，掀起一場桃色風波後，身邊男伴繼續車輪轉。昨日凌晨陳雅倫現身醫院，分別獲兩名揸波子的中年男伴管接管送，看來年過40歲的她仍具魅力。
診症半小時
昨日凌晨近4時，陳雅倫由一名中年男伴陪同到跑馬地養和醫院，當時陳雅倫向接待處護士說：「唔該我想睇急症。」其後她坐到沙發等候，由同行男伴為她辦理手續，該男伴年約40餘歲，滿頭灰髮，身形偏瘦，現場見他與陳雅倫十分熟稔，陪她進行簡單檢查後，又並肩往一旁輪候。
其實陳雅倫精神尚算不錯，與灰髮男伴有講有笑，其間男伴發現有記者在場，竟即丟低陳雅倫，往停車場駕駛一輛價值約133萬元的灰色保時捷跑車火速離開。
半小時後，陳雅倫睇完醫生，她居然神奇地另覓一名中年男士護駕。該男子戴眼鏡、穿西裝，唇上長有一顆大粒癦，其品味與灰髮男伴一樣，也湊巧駕駛約價130萬的藍色保時捷跑車代步。大粒癦男伴往急症室接陳雅倫後，甫出醫院即被記者追訪，戴黑超的陳雅倫面黑如鑊底，冷冰冰問記者：「你哋邊間呀？」她得悉後繼續面燶，匆匆上大粒癦的波子絕塵而去。
近年工作量大減的陳雅倫，曾自爆會到泰國拍攝彭順執導新片《謀劃者》，在片中飾演酒廊歌手，色誘飾演私家偵探的郭富城，但因她衰多口爆劇情，結果臨陣被飛。
死撐冇接戲
陳雅倫昨日對於漏夜入院在電話中說：「出入醫院好普通、好正常，我冇話自己唔舒服，但唔需要交代任何嘢。」至於兩波子男是否其男友？她說：「乜你啲問題咁得意？朋友嚟㗎咋，我冇男朋友，朋友都可以互相關心。」再問陳雅倫有否接拍《謀》片？她卻說出另一版本：「冇接到，因為我接咗上海電視台一啲job，咁彭順部戲都係2、3日戲，就唔到期，其實我都唔係咁想去泰國，有恐怖襲擊，等第日有多啲戲份再合作啦。」
採訪、攝影：娛樂突發組
