第一次接觸Pizza，唔係因為「必勝客」，而係細細個睇得《忍者龜》太多，俾佢個誇張食相感染。正如叮噹鍾意食豆沙包，早已家喻戶曉。數數手指，今年係《忍者龜》24歲生日，喺3月底佢剛好推出XBox360、PSP遊戲以及全新CG電影，挾復活節假期來個大翻身，可否令呢群由細睇到大嘅三十幾歲「龜迷」重拾當年情？即睇！
記者：陳國輝
追蹤視覺系統Zoom到嘔
「我唔怕暈。」唔係指過山車，而係講番十幾年前打3D射擊遊戲，全因第一身畫面太真實，令唔少Fans嘔完再打，打完又嘔，好攞命！傳統《忍者龜》由KONAMI炮製，呢次改頭換面由鬼佬公司Ubisoft負責，最大賣點一定係全新嘅追蹤視覺系統，佢特別之處係角色及背景會隨住遊戲節奏ZoomIn或ZoomOut，舉個例，當紅頭巾拉斐爾由大廈底部向上爬嗰陣，鏡頭會越變越近，另外喺隻抽時，畫面亦會快速ZoomIn，俾你昅清楚佢嘅微細動作。都係嗰句，唔驚玩到嘔嘅話可以長煲。
用合作技屠殺超華麗
老實講，你話隻Game出XB360，但竟然唔支援Online四人混戰，點都有啲遺憾。不過，單打都有好處，就係冇人同你爭，而且你仲可以車輪戰玩晒四色龜，用齊唔同武器對付敵人，諗落都爽爆！咁多種戰鬥系統入面，最值一提係二人合作技，某啲情節上，忍者龜唔會單獨行動，當你遇上成群嘍囉嗰陣，班兄弟會殺出嚟救你，甚至用合作技時會產生超華麗閃電畫面，敵人會一批一批咁死晒。嘩，轟烈過大屠殺！
唔識玩練定就啱
𠵱家有邊隻Game不設PracticeMode？睇怕無。皆因動作遊戲唔單止講求畫面流暢，仲鬼咁多招式，要全部記得晒點用幾乎冇可能。所以落場前最好先入「健身室」操Fit啲。另外，喺過關或者避開敵人攻擊嗰陣，亦需要借助忍者龜獨有嘅求生本領，例如飛簷走壁、翻牆躍溝、輕功水上飄……又如利用連續技對付敵人，亦建議先進入「健身室」反覆練習先出擊，打得叻，始終係靠熟能生巧啫。
電影版有章子怡做反派！
同期推出嘅CG電影版，故事與遊戲相若，值得一提係邀請到章子怡為反派角色卡拉配音（英文），動畫製作方面由扎根於香港嘅MAGI負責，淨係睇見全新造型嘅3D忍者龜，已令人眼前一亮!
XBoxLiveArcade：經典重溫
跟足《忍者龜》咁多年嘅死硬派，肯定玩過1989年由KONAMI開發嘅《TMNT》街機版，當然𠵱家落機舖都未必搵得番（據聞連至經典嘅200合1街機都冇），不過，你只需要用XboxLive上網就單撈到，唔只保留番7個原汁原味關卡，仲支援4人同時戰鬥，超爽快！
售價：400MicrosoftPoints
PROFILE
機種：XBOX360
類型：動作
開發商：Ubisoft,Inc
玩家：1人
售價：$299