昨日講起阿根廷馬，搵資料時順便睇埋福克蘭島，英阿為呢個小島打仗，眨吓眼已經過咗二十五年，唔睇唔知，福克蘭島打完仗後，英國索性開放福克蘭附近海域，向各國漁船發捕魚牌照，徵收魚稅。一開放之下，唔得掂，現在福克蘭島居民嘅人均收入係五萬美元，高出香港一倍，島上最大企業──養羊，已經請晒智利人做，本地人唔再捱咯。現在又話在福克蘭島海域內探油，初步發現令人滿意，但福克蘭人就驚住太有錢，破壞原來生活形態，更會引起戰爭（與阿根廷人再打仗爭油），認為唔鑽油好過。
人均收入五萬美元，喺世界上數一數二，咁有錢，的確難以維持原有嘅節儉樸素生活，除非有自制力啦。呢日早返工，想話食早餐，唔，置地文華酒店一個早餐好貴噃，點捨得，於是返上辦公室，打電話去翠華茶餐廳叫早餐外賣，炒蛋麵包加火腿通粉與咖啡。外賣送到之後，睇完《蘋果日報》先至食，點知外賣送漏麵包，唯有將啲炒蛋倒入通心粉，照食可也。
食食吓，記起大富豪田少受委任為旅發局主席之後，記者問佢他日旅發局會否係「大花筒」，田少自然否認，並且話自己唔係大花筒，平時都有食快餐店豬扒飯㗎，三十蚊有找，不過食法唔同啫。田少叫夥計到快餐店買飯，返到辦公室，將飯裝入高檔器皿，一邊聽古典音樂一邊食，幾好享受吖。可惜記者唔識問埋田少，食二十幾蚊豬扒飯之時，有冇配二千幾蚊一支嘅法國紅酒呀？
左丁山食雞蛋火腿通心粉之時，幻想自己係田少，慢慢享受，只可惜通心粉載在發泡膠碗內，冇厘氣氛！
食完早餐，睇吓《信報》，港大陳耀南教授專欄講對聯，以特首選舉教學生，寫下「家傑由人選，蔭權自上來」，幽默到極兼且貼題，左丁山笑到幾乎噴咖啡。係唔係一家之傑，梗係由他人判斷或選出嚟啦；有父蔭、福蔭、天蔭而得到權力/權位，自不然權由天賜，使乜你哋投票！崇基學院中文系出身嘅陳教授，出手果然不同凡響。