時間：96年12月7日
地點：永祥大廈
人物：九舅父洪泉
曾經哄動全港嘅鄧家爭產事件，堪稱世紀連續劇，當中最暴力嘅一幕，係兆尊九舅父洪泉（祥嫂九弟）踢門掟電話，令爭產風波演變成血案。
話說96年12月7日，小艾同兆榮向八舅父（洪家泉）追討60萬欠款，當日佢哋搵埋九舅父同十一姨洪國華幫拖，攞埋八舅父欠債嘅證明文件，去到位於永祥大廈二樓嘅永祥唱片有限公司寫字樓，向八舅父追債。
性格剛烈嘅九舅父一去到門口，即刻起飛腳踢門，入到去就指住洪家泉猛鬧佢借錢唔還、以佢為恥，跟住激動到又掟電話又掟玻璃杯，結果隻手俾玻璃碎片𠝹傷，血花四濺，嚇到在場班娛記呆晒，最後驚動到警方到場調停。
不過始終「家和萬事興，家衰口不停」，所以舊年小艾唔止幫祥嫂擺大壽，仲同兆尊、兆榮逐一吻賀祥嫂，幾仔乸冰釋前嫌，充滿戲劇性。
本欄逢周一至周六刊出