徐步高名人推介讀好書，《狼圖騰》全港熱賣，連政府高官都人手一冊，難得嘅就係海洋公園鬼頭波士盛智文都配合讀書活動，即時入咗兩隻北極雪狼，喺海洋公園展覽，協助市民貼身加強通識，學習吓乜嘢叫做狼圖騰。
不過美中不足嘅，就係海洋公園展覽班雪狼，同市民隔得好遠，D雪狼有雪狼烏眉瞌睡瞓覺，市民有市民靜靜雞睇。須知道《狼圖騰》E本暢銷大陸嘅名著，重點係描述野狼在森林之中弱肉強食、嚙咬獵物嘅生存定律，將野狼血腥描寫到十分浪漫，令人在E隻畜生身上，睇到騰飛崛起嘅壯麗遠景。
咁海洋公園展覽雪狼，市民得齋睇兩個字，係咪缺乏少少互動呢？增加知識，往往係靠實驗互動，若然海洋公園可以參考內地好多動物園咁樣做法，在雪狼圍欄外，準備D生雞活鴨、山羊小黃牛呀咁，供香港市民帶仔女去參觀時，廿蚊一隻，父母畀錢，交由個細路仔將D生雞掟落去，笑住欣賞雪狼追逐撲殺活雞鴨嘅全動感過程，咁對於立體化了解《狼圖騰》E本書，無疑大有幫助。
加埋禽流感疑雲不息，D禽販成日嗌救命，話市民唔敢食雞鴨，佢哋血本無歸，海洋公園搞多個生雞活鴨餵雪狼嘅親子活動，又可以令D雞鴨禽販去晒手頭大量積壓嘅存貨，經濟多條出路，一舉兩得，又何樂而不為呢？