上個禮拜桑坦德離奇地反勝畢爾包5:4，中咗推介嘅單W，通常贏得咁驚險隨時要回吐番，所以今輪唔掂桑坦德嘞。呢個禮拜決定向難度挑戰，揀咗意甲「紅盤王」安玻里，周六作客AC米蘭不敗開「客勝」。
睇番今場外國標準盤開到AC米蘭W得1.4倍，亞洲盤唔係讓一球/球半低水，就係讓球半高水。嘩！個盤口有啲過辣喎！AC周中啱啱先同拜仁激戰完，仲要最後補時階段先俾對手迫和，士氣唔受打擊就呃人嘅。嗰場波廸達嘅演出認真一般，第2球封近柱都要俾雲拜頓窄位射入，狀態真係麻麻。
AC米蘭或收主將
而且AC下周三又要作客拜仁打復仇戰，我諗馬甸尼、施多夫同卡卡又唔會搏足全場，得番次回合要停賽嘅基拿甸奴同朗拿度打雙箭頭，但中場供應有限，呢個上盤認真「牙煙」。
嗰邊安玻里唔經唔覺已經殺到上第5位，絕對有權攞走下季歐聯參賽資格；今輪佢哋冇人停賽又冇人傷，前面嘅沙達廸同普斯又「弗」到震，應該冇得輸。最衰馬會冇亞洲盤買，如果唔係個下盤索硬，不過「客勝」都夠好分啦。
文：畢傑