友人間流傳一個悶笑話多年，話說有日幾位「賭海迷徙」，圍攏於電腦前鑽研當日國際賽賭波心水，就喺各人意見不一之時，波經名家某某路過，以儼如普渡眾生之勢，拋下一句：「今晚可以買冰島！」眾人齊回應：「冰島？有咩人咩料？」詎料某某猶豫兩秒後，苦笑：「…唔知。」
越熟識唔代表實贏
結果冰島真係贏波！其實呢啲例子好常見，賭博嘅嘢，越識就越多因素要考慮，以為花幾個鐘頭做晒功課，度出嚟嘅心水無得輸，最後作局自困，賠錢賠精神；唔識嗰啲求其買冧把或者主客場，就反而贏到，死未？
好似啱啱過咗個禮拜日，求其捉下路都幾好賭。日頭兩場日本波及夜晚八點半食飯時間嗰幾場荷甲，除咗阿積士贏3:0，畀個「3.5球」頂住之外，全部瞌埋眼買「大」就搞掂；甚至當日7場法甲，5場開呢個聯賽常見嘅「細」，有本有利，邊使左諗右諗？日聯及荷甲買「大」嗰啲，更係半場已經收錢，或者揸住兩球叫晒糊，不知幾爽！
呢個復活假期英國波開快車，大部份球隊3、4日內踢兩場，度波時可能又要考慮啲球隊係咪會攰，又或者留力又剩等因素。一於唔諗咁多，繼續向呢輪法甲嘅「細」荷甲嘅「大」埋手算數。
文：華度