煲呔連任後委任新一屆青年事務委員會成員，有兩個名較矚目，一個係前一哥李明逵，另一係主席李宗德。李宗德同八方講，抱負係將香港青年打造成「中國香港青年人」，因為青少年缺乏對國家認同感、歸屬感，回歸10年，好多後生仔連普通話都未講得掂，有幾愛國，聽吓都知。如果特區政府要幫青少年搞洗腦式愛國教育，今勻深慶得人。
李宗德又話如果搵到前一哥做青委會代言人就好，貪佢高大威猛又正氣親民，宣傳愛國教育，好過搵啲三、四線明星仔。56歲嘅李宗德有三個女，最大嘅30歲，最細得12歲，算係接觸到唔同年齡層年輕人，時下最in潮流動態，佢都略知一二。