一班被賣豬仔的印度人，把毛里裘斯由荒島變成非洲天堂。阿燦廖偉雄，做過演員、傳銷、地產及食品生意，曾經風光，也曾經破產，大半生嘗盡得失成敗，今次他隨《向世界出發》到毛里裘斯，學習令當地致富的古老製糖方法，探討毛里裘斯由荒島變作全球最重要原糖生產地的成功過程，同時與大家說得失，論成敗。
位於非洲最東南面的毛里裘斯，人口約有120萬，當中七成為印度人，他們的祖先都是200多年前慘遭賣豬仔到當地做苦工。廖偉雄（阿燦）今次毛里裘斯之旅，除參觀了被當地印度人視為恆河看待的聖湖、當地人賴以致富的蔗田、坐潛水艇到深海獵奇外，還跟黑奴後代學跳Segadance，並試坐早年毛里裘斯的主要交通工具──亞達伯拉象龜，令他大開眼界。
銀針穿脷 驚
不過令阿燦最難忘的，還是當地一年一度的「Cavadee」大祭祀，當地印度教每年均會舉行盛大的祭祀，信徒會以銀鈎穿過身體吊滿全身，並以銀針穿過舌頭，然後抬着祭壇作6小時大巡遊，深信只要有勇氣通過這些考驗便可獲得救贖，邁向成功。阿燦坦言親睹信徒用銀針穿脷的過程時，感到驚嚇不已。
79年憑電視劇《網中人》走紅的阿燦，93年開始做美容傳銷生意，99年因投資失利申請破產，由傳聞中幾千萬身家變成一無所有。阿燦表示當年破產後，最擔心的是妻兒食住及學費問題，但事後從另一個角度看來，卻覺得這是一個好的轉變，他說：「我同個女講，你中學畢業，我暫時冇錢畀你讀大學，你出嚟做嘢先，有錢再去讀，結果我個女做咗一年嘢左右，知道賺錢艱難，返去讀書時成績好咗好多，所以你睇一個問題時，係有唔同角度去睇，當你遇到困難時，佢（大女）會領略到唔同嘅嘢，對佢下半生有個突飛猛進嘅幫助。」
享受過程 悟
阿燦破產後試過賣叉燒也試過出書，希望藉此翻身，結果換來一次又一次失敗，究竟在阿燦眼中，怎樣才叫成功？他說：「成功唔一定代表有錢，愛廸生整個燈膽，試驗2000幾次，一路俾人話佢係儍佬，發明咗燈之後，搵錢嗰個唔係愛廸生，但佢係一個名留千古嘅人，係改變呢個社會嘅人。其實成功與否唔重要，而係你要享受呢個過程，當你懂得享受過程，哪怕留下幾多漣漪、為呢個社會嘅巨輪推動幾多樣嘢，你都會有一點功績喺度，呢個就係我𠵱家睇成功嘅價值。」
撰文：戴彩煥
廖偉雄《向世界出發》之「成與敗」單元將於下周一晚10:35pm翡翠台播出。
