利物浦前晚作客大勝燕豪芬3粒，歐聯4強席位可以話坐定粒六；當中最開心梗係謝拉特，事關呢位神奇隊長上半場27分鐘頭槌先開紀錄，個人累積15個歐聯入球，超越名宿魯殊，成為紅軍喺歐聯（前身歐冠盃）入球最多嘅球員。
謝拉特賽後面紅紅咁話，細細個已睇魯殊踢波，今次打破紀錄有啲尷尬。不過，我求驗客覺得，謝拉特真係唔值得高興，因為魯殊年代邊有咁多歐冠盃踢？再講，歐聯紀錄保持者、皇馬嘅魯爾已經攻入56球，多謝拉特成條街；紅軍近年經常踢歐聯，05年仲捧埋盃，但首席射手都只得15球，反映球隊攻力真係麻麻。
紅軍晉級幾成定局，連燕豪芬教練朗奴高文賽後都大嗌投降，難得紅軍領隊賓尼廸斯仍然冷靜，吓吓提住05年決賽，點樣落後AC米蘭3粒都可以扳平，最後射12碼贏埋；到底賓尼廸斯係真心警惕球隊，定有意無意攞番啲威水史嚟講呢？有人歡喜有人愁，紅軍後衞奧利里奧喺75分鐘，因一次傳球令右腱撕裂；經初步檢查，呢季唔使預佢，就算紅軍殺入雅典決賽，奧利里奧都只可以做觀眾，難怪佢被抬離場時流下英雄淚。