復活節假期今日開始，去到下個禮拜一先完。冇去外遊嘅球迷留港亦不愁寂寞，事關呢4日假期日日有歐洲波打，其中英超聯仲開快車，3日內打兩輪㖭。
信數據買主隊
趁今日等我求大俠同大家做吓賽前分析。睇番上季個復活節檔期，賽果大致正常，強隊好似車路士就兩場贏晒，分別作客贏保頓2:0同主場贏愛華頓3:0，但亦爆咗一場半場波，例如曼聯就喺主場被新特蘭迫和0:0，令1.12倍主W大熱倒灶。另外要留意嘅係，主隊嘅勝率好高，頭輪10場贏6場，尾輪則8場贏5場。如果對嚟緊啲英超聯冇乜心水而又相信數據嘅話，大可以合埋眼買主隊，應該有得執吓。
不過，由於歐聯亦係同樣開快車，喺下個禮拜二、三會上演埋8強次回合賽事，所以曼聯、車路士同利物浦呢3支歐聯球隊，就只係會喺聽日踢1場英超聯。𠵱家曼聯同車路士雖則喺英超聯鬥緊，但因為佢哋兩隊都喺8強首回合揩嘢，未能贏波，所以就算佢哋喺復活節檔期嘅對手只係熱刺同埋樸茨茅夫，都係小心為上。