今日是清明節，在慎終追遠的日子，更是許秋怡痛失亡父後一星期。其粵劇名伶父親許堅信上周在家中猝逝，享年71歲。他離去那天正是亡妻的生忌，而昨日原是許父的生日，可是卻變成頭七。可憐秋怡的雙親在兩年間先後辭世，教她悲痛不已。
昨日原是粵劇名伶、許秋怡父親許堅信的72歲生日，女兒許秋怡早於上月已為他訂了壽宴，可惜人算不如天算，許父上周四（上月29日）忽在家中病逝，享年71歲。秋怡昨日向本報親口證實父親離世的消息，又表示最遺憾是當日正在內地常州登台，未能見父最後一面。
凌晨忽然昏倒家中
許秋怡昨日接受電話訪問時說：「上周三夜晚，爸爸忽然見周身唔舒服，我又咁啱返咗內地登台，於是書麒就送咗佢去就近嘅24小時診所睇醫生，醫生話佢係感冒，攞咗藥就返屋企休息。我因為唔喺身邊，一直心掛掛，打電話叫書麒要通宵照顧爸爸。」
秋怡續說：「我星期四凌晨又打番屋企問情況，書麒話爸爸都OK，點知我哋講咗幾句收線後，爸爸嘅情況有變，佢忽然暈倒，書麒即刻叫救護車，但嚟到搶救後最終不治。」秋怡表示再與丈夫通電話時接獲噩耗，即時情緒崩潰，還立即返港。她說：「我當時真係接受唔到呢個事實，因為爸爸走嗰日，正係我媽咪嘅生忌，而爸爸嘅生日，𠵱家就變咗佢嘅頭七。佢明明身體好健壯，70幾歲人仲日日返演藝教書，點知我同佢冇多講一句說話就走咗。」
歎樹欲靜而風不息
近日天氣陰晴不定，秋怡在家中思念亡父，每看見大風吹動樹木，即感慨萬千。她說：「我個腦一片空白，只係不斷浮現『樹欲靜而風不息，子欲養而親不在』呢兩句說話。」談到母親04年被癌魔帶走，上周其父又離世，秋怡哽咽着說：「兩年內我兩位至親嘅人都先後離開，我覺得好傷心。」
談到亡父的身後事，秋怡表示：「爸爸之前見我搞媽咪嘅後事好勞累，佢講過等將來佢離開，將佢火化嘅骨灰撒落大海就算數，不過我又點捨得咁樣對爸爸？我要妥善安排佢嘅身後事。」她透露稍後會在沙田寶福山為亡父辦理身後事，又謂：「我睇過爸爸嘅遺容，慶幸佢個樣好安詳，走得好舒服。」
採訪：比華利
