今年潮流要Bling要閃，衫褲鞋襪樣樣鑲石！咁攞起手日日見人嘅手機又點少得？貼晒石喺又Unique又有性格，不過喺放二手時就冇晒「格」（價格）！醒目嘅先達手機舖，諗到先將手機全包防花貼、後鑲石，咁先潮得有價值嘛！
記者︰陸俊雄
攝影︰陳陶鈞
多得濱崎步
咩嘢人最愛貼閃石？Sales話：「係女人！仲係班喪煲日本雜誌嘅女人。」先係06年始興水晶甲，跟住衫褲鞋襪、相機、電話，其實只因日本有個濱崎步；佢接受任何訪問時，拎個化妝袋都閃過人；今年仲興？吹咩！鬼叫各大時裝品牌話明延續上年Bling爆潮流，隨時閃到過08；Sales仲話：「完全係明星效應！不過潮得叻一定要有個人風格，所以林狗咪帶領潮流囉！」
防花貼進化版
貼石出晒名嘅先達MoshiMoshi負責人阿文表示：「99年星際已經有舖專幫人做防花貼，後來發現賣二手時，撕去防花貼，手機外殼保存如新，令賣價更高，防花貼自此興起。」𠵱家再演變成防花貼上再貼水晶，到今日港日明星都喺衣飾鬥Bling，將水晶貼到成個面都係，咁先夠潮。就算過一排你唔鍾意，即管貼第二款，水晶下因有防花貼保護，所以貼石用嘅混合膠，完全唔會整花外殼。
貼石價點樣計？
𠵱家坊間貼水晶，分別有最平大陸石、中級捷克石及高級Swarovski（公認最閃）。整個過程，先係計水晶價、不論顏色：50粒細石$88，若改用大石，就1開4，$50只可貼12、13粒大石。
至於手工費就幾浮動，要視乎客人要求；例如最常見圍芒貼$30（20分鐘）；$40至$50貼滿機背（30分鐘）；前後貼晒再加圖案$150-$200（4小時至1日）。SalesHidy話：「有人拎波鞋、Hands-free、MP3機嚟貼，就連阿Rain演唱會Fans送嘅閃石Mic，都係出自我哋手筆！」其實大家有時間可以DIY，鴨記$45有144粒細Swarovski水晶；但如試過倒瀉慢慢逐粒執返嘅痛苦，就知點解畀人貼好過！
包膠貼Pattern
自問唔喜歡浮誇，玩純粹點綴！可以玩包膠貼石；防花膠本身已有顏色圖案，只要稍加水晶點綴已好正！玩Pattern、配圖案底色，玩得型格。
至激全閃機面
潮興！係要貼到成個面都係水晶，連部手機真身都望唔到！想去到咁盡，一定要買啲平白位多嘅手機，好似摺機類會較適合；直身機都得！不過字粒位同芒面玩唔起囉！
玲瓏浮凸貼
除咗貼水晶，貼紙圖案都OK潮！不過當然唔係普通嘅Hello咪咪貼紙咁流啦！係要玩凹凸圖案又似織錦嘅貼紙，龍就外國人最Buy、鯉魚多生意人用、葉形較得女士歡心。
MoshiMoshi（26289991）
地址︰旺角先達廣場1樓F110舖