炒股必勝法，係好多股民窮畢生時間、精力、心血同財產想要煉就嘅心法，喺《網易論壇》，網友「億＠弋」同一班朋友討論到一篇「只有兩種人可以在股市中盈利」嘅文章，總結出「金字塔頂端，只有兩種動物可以到達，一種是鷹、一種是蝸牛。」
飛鷹盤踞金字塔頂
鷹之所以可以到達金字塔頂端，係因為牠具有超強的能力、強健的體魄、傲視一切的英氣，牠非常聰明；蝸牛啱啱相反，牠雖然笨，但勝在鍥而不捨。自古以來，但凡成功者，一係就聰明智慧、能力精力過人；一係就踏踏實實咁做好佢份工。
至於用喺股市上面，唔少人經常掛嘴邊：「十個人之中，七蝕、兩平、一個賺。」所以股市嘅強者，同金字塔頂端兩種動物可謂異曲同工。一類大概係先知先覺，可能係機構、大戶，即金字塔頂嘅飛鷹。
另一類係理念正確嘅散戶，佢哋唔張揚、唔煩躁、唔會怨天尤人，踏踏實實炒自己應該炒嘅股、賺自己應該賺嘅錢。有目的、有計劃咁去炒自己嘅股票，絕對唔會人云亦云，佢哋就係金字塔頂嘅蝸牛。
蝸牛唔怕長揸好股
對於鷹同蝸牛嘅比喻，網友我住長江頭回應：「兩個月前，我同一個朋友一齊入市炒股，佢入市買定一隻股票就不郁，至今已升40%。我就日日轉嚟轉去，𠵱家股票收益只得10%；反觀曾經買過嘅股票，基本都升成40%。」
其實，億@弋所講嘅蝸牛，採用嘅就係價值投資法，挑選優質股票長揸，等股票升值。股神畢菲特講過：「投資者動作增加，但其回報反而相對減少。」
http://bbs.163.com/