多名光顧過無牌獸醫李祖衛的狗主，均指摘李的服務「貨不對辦」。家住公屋的葉先生，上周二帶同兩隻分別半歲及八個月的流浪狗，到李的診所進行絕育手術。
註冊獸醫指不專業
雖然收費僅700多元，較坊間便宜近一半，但兩隻小狗手術後卻流血不止，要送往另一間註冊獸醫診所搶救，證實其中一隻感染腹膜炎，花了4,000多元才能保命。葉先生引述替小狗搶救的註冊獸醫，指李的手術毫不專業。
另一名狗主林小姐，於去年底帶同愛犬Bingo到李的診所接受狗隻行為心理學課程，「我隻狗有時曳，蝦其他細狗，我見佢（李）話自己係世界獸醫學會成員，又話喺外國讀過狗隻行為心理學，咪帶隻狗畀佢睇。」課程收費原定2,800元及為期兩周，但結果10天便結束，收費卻增至5,100元，「佢話要收見面費，又話Bingo喺佢度寄宿食咗好多罐頭，但Bingo返嚟，卻足足瘦咗10磅，見晒骨。」
另一名狗主董先生透過慈善團體認識李，最初被他對狗隻的愛心吸引，但後來得悉，有狗主要求他捉一些流浪狗回來接受絕育手術，李竟開天索價，「佢話淨係捉都要2,000元一隻，仲未計手術費，我哋班狗主梗係拒絕啦！」
本報記者