𠵱家幾乎全民炒股，中學生亦唔例外。自稱17歲嘅demonkk喺《香港討論區》自爆，早前食晏時跟同學分享投資心得，點知俾隔籬個老伯單單打打：「𠵱家啲後生仔乜嘢係投資都唔識，就連每手同每股都唔知。」demonkk事後話：「雖然跌市，但我都準備好止蝕位。我睇過嘅投資書數目，他可能連十分一也沒有。」
炒股耐 唔係叻
網友嘅反應都幾分歧。水不拉力挺：「唔少自恃『食鹽多過我哋食米』嘅中年人，見升就話好股，跌一日就話垃圾股。買股經驗要有，但知識更重要。」jcwk勉勵：「學無前後，達者為先。有啲玩咗股票十幾年嘅，仍然係新手一名。」
令年輕投資者自豪嘅，除咗投資成績，更多係因為連本都係私己錢，贏輸只需同自己交代，好似water300mm咁，「我當年15歲開始投資，錢係自己啲利是同補習收入，十年後都冇後悔。」
Zyzzye話唔好低估年輕人嘅儲錢能力：「如果當年啲錢唔係去咗買衫買手機買名牌，𠵱家夠買一手滙豐（005）有乜出奇！」boldwin同意：「如果我17歲唔玩遙控、唔聽中森明菜，留番啲錢買一手和黃（013），家吓都唔知升幾個開。」
Chris0624話：「學識投資唔係最好，最好學識謙虛，唔係最多做『神童輝』。」牛頭角順嬸亦話：「不要太堅持己見，要學習聆聽，可能阿伯係世外高人呢。人哋話發財立品，我就話立品可以發財。」
有限錢 唔怕輸
喺香港要夠18歲先可以開戶炒股，17歲嘅demonkk點解可以炒，佢冇交代，至於讀緊書係咪唔應該涉獵股市，Fareast1001話：「你着意嘅應該係讀書，如果唔係就會變咗炒股，炒股唔係你哋年紀嘅事。」相反，rainrain認為趁後生買個教訓都好：「趁冇乜錢嗰陣輸有限錢，仲有翻身嘅日子，不過至緊要學業行先，時間分配得宜都可以接受。」老邪@樹熊就話：「當年索羅斯、畢菲特都係青少年就入巿，請問佢哋係咪急功近利？」
www11.discuss.com.hk/