查濟民家族入主亞視的消息傳出後，一眾亞視藝員表現雀躍，寄望注入新資金能為公司沖喜，亞視「一姐」張文慈昨日接受本報訪問時說：「對我嚟講冇乜影響，我𠵱家同亞視係部頭約，作為演員，邊個係老闆唔重要，邊度有機會就去邊度，但有新公司投資亞視，希望可以畀藝員多啲機會拍嘢，我都望亞視好嘅。」
曾歷亞視多次改朝換代的林韋辰說：「易手係一件好事，其實已經習以為常，有新資金注入，必定有一番新景象。」他期望新股東會引入更多新元素，擴充人手，製作更多節目，從而擴大整個電視業市場。
望增加製作兼加薪
珈潁則說，公司多次股權變動，對藝員影響不大，「做藝員都係做好呢份工！亞視始終係商營機構，有新資金就會有新節目，有更多製作，希望第日可以多元化，我哋可以有更多嘢做。」她希望日後公司製作更多劇集，給藝人更大發揮機會，更希望會獲得加薪。吳亭欣正考慮跟亞視續約，得悉公司易主後也感開心：「係好消息，亞視第日咪會多啲嘢做，對藝人係好事，應該會開番多啲劇，咁續約傾人工都易啲。」
本報記者