食知味：紅粉菲菲Stephy<br>食素令女人又瘦又靚

食知味：紅粉菲菲Stephy
食素令女人又瘦又靚

有人信一見鍾情夠浪漫。不過路遙知馬力，愛過之後，彷彿若有所失。有人覺得日久生情比較好，可以細水長流，互相了解後，愛才長久。感情同食都是一樣，好多食物表面睇落好靚，食落吐也來不及。惟有對食物作出了解，再食，至會食出真味。鄧麗欣（Stephy）就選擇與素菜日久生情，決定食一世，因為可實現女人的最大夢想，就是面色紅潤又可瘦身！
記者：梁學文
攝影：譚盈傑

動物太可愛唔敢食

很多人認為食素就一定冇味道，而且賣相不吸引，結果一聽到去食齋，多數人會避之則吉。對於食素，Stephy有自己一套睇法：「我一向都食得好清淡，唔太鍾意食得太濃味。以前都會食肉，不過都係覺得食素好。一路到大個，都保持食得清淡，發現素菜對自己身體最好。於是兩年前，我就決定戒肉食素。」Stephy由細到大一直有食素，漸漸日久生情，越食越喜歡，對身體又好，於是長期食素。
其實除了對自己身體好之外，Stephy食素的另一個原因是愛小動物：「我覺得小動物好可愛，唔應該食。次次食牛食豬食羊，食完之後我都覺得對動物唔住，所以兩年前的某一日，一覺醒來，我就決定戒肉食素。」

味道多元化唔會寡

講到食素的經歷，Stephy說：「好記得當我決定食素之後，有一次要去加拿大，心諗今次實無啖好食，因為直覺覺得加拿大是個肉食國家，不過原來並非如此。最印象深刻是去食火鍋，竟然有素肉丸，食得開心又放心。其實食素都好好味，好多素菜都有唔同的味道，總可以滿足到食慾。」其實好多時人們對一些事、一些人有偏見，試過、接觸過、了解過之後，就會發現是自己的誤解。好多人怕食素會寡，其實素食都可以好多元化，Stephy說：「我試過一次去齋舖食素，越食越唔妥，因為個齋真係好似肉，而且有肉味，好怕真係食緊肉，問問廚師，原來真係素菜。解釋之後，至發現食素都可以好多元化。有好多素菜都會加入大豆纖維，令素菜變得似肉類的口感，食落唔會寡，而且亦提供了所需的營養。」

■因味道模仿得太真實，有時真的以為在食肉！

素食對身體好

人人都知少肉多菜身體好，Stephy都深明此道，亦覺得食素之後，身體確實比食肉的時候好：「最明顯的是面色，我的工作好多時都要捱夜，食肉的時候面色唔好眼袋又深，不過食素就唔同，就算我休息唔夠，面色都會比較好，唔會太蒼白。最緊要的是可以瘦到身，效果唔會立竿見影，不過就會慢慢來，體重慢慢減得到。我諗瘦到身，應該是素食的最大功效。」由慢慢了解素食，到愛上食素，對Stephy來說是個日久生情的體驗，不知有否影響到她為新歌《日久生情》填的歌詞呢？

有機菜冇味精
食得放心

有時去食飯，間中也會點味羅漢齋，可惜材料長期浸在大量的味精和油之中，食完口亁不特止，而且仲會覺得滯，腸胃活受罪。而Stephy就推介大自然素食的素菜，她話味道好，感覺亦跟一般齋舖不同。大自然素食冇羅漢齋，更冇味精，包保食得健康。負責人和哥話：「其實我本身不是素食者，不過近幾年見雞有禽流感，海鮮又有雪茄毒同孔雀石綠，令到我不敢亂食。於是就煮素菜食，食得健康又放心。」開業短短3個月，大自然素菜已經日日滿座，相信跟用有機菜煮素菜有關。

大豆纖維似真肉

大自然素食的素菜主要是用有機菜煮，貨源來自台灣。這裏有很多蔬菜，有些連名都未聽過，好似蘇州菜、木宿芽等，都是和哥自己找回來的。Stephy就大讚味道好，而且竟然有食肉的感覺：「如果不說是素食，我也不覺自己正在食素菜，因為好有食肉的感覺。」雖然有點「齋口唔齋心」，不過食得健康，無問題啦！大自然素食的室內設計，亦有別於一般的齋舖，沒有佛像同佛經，改用現代的設計，似間中菜館多過似齋舖。

原隻南瓜煮魚（須預訂）$78

別以為這款魚的味道跟金絲裹劍魚一樣，味道是完全不同的，而且還有一點腥腥的感覺。先將足3斤重的本地南瓜蒸熟，然後加入豆豉同南瓜燜魚肉，魚肉吸收到南瓜的甜味，份外香甜。