全球市值入咗銀行股三甲嘅工商銀行，噚日公布上市後首份成績表，成班高層留喺北京召開發布會，然後用視像會議形式畀香港傳媒參與，同當地記者輪流發問。作為首家A+H股同步上市兼全國最大國有銀行，咁嘅安排，都係政治正確，可以理解。
之不過，一直掛在口邊要國際化嘅工行，喺答問環節編排上就未算國際化，管理層回答長篇大論唔在講，發問時間連英語繙譯，只夠兩地傳媒共發問5大條問題，香港配額只得兩條，咁嘅發布會安排，同佢哋嘅業務發展一樣，仲有好多改善空間。
內地賓架薪酬脫軌
工行兩位最高領導人，薪酬亦喺業績中披露，去年度董事長姜建清，稅前薪酬總額係130萬人民幣，行長楊凱生就收125萬元，雖然內地賓架薪酬水平近年改善唔少，但作為全球市值3大行嘅主席同CEO，薪酬待遇應該逐步同國際市場接軌至啱。
[email protected]