到陸羽飲茶，餐廳羅帶咗三位美國朋友嚟，原來係從洛杉磯來香港睇七人欖球賽嘅。餐廳羅話有唔少歐美朋友喺上星期抵港，令佢應接不暇。上星期四晚就同另外幾位鬼佬朋友到駱克道「美利堅」飯店吃早飯，全餐廳爆晒，佢嘅朋友係一早訂位嘅！早到幾時？二○○六年十二月啫！呢間餐廳嘅食客以外國遊客為主，七人欖球賽肯定有益於佢。我哋食外江菜，有其他地方好揀，左丁山已有二十年冇去「美利堅」，費事同啲遊客爭位。
食完晚飯，餐廳羅自不然帶成班人去蘭桂坊蒲吧，佢話蘭桂坊熱鬧到似新年除夕，街上企滿外國遊客，氣氛非常熱烈，足以證明香港係亞洲「世界城市」，「活力之都」，七人欖球賽之轟動世界。點知道，深夜時份，警察竟然到蘭桂坊「掃街」，喝令人群走返入酒吧（其實裏面已經滿到瀉），否則就要鬆人，以維持街上秩序。餐廳羅想話去同警察理論，畀朋友拉住，驚住佢飲咗兩杯，與警察口角！
餐廳羅到咗星期五仲係勞氣，話警察直情係與旅發局倒米，令遊客留下不良印象，餐廳羅話：「個個周末，蘭桂坊街上都企滿人㗎啦，幾時發生過騷亂？」佢問左丁山可以去邊度投訴，左丁山當然教佢打電話畀張宇人議員投訴，希望呢位餐飲界議員能為佢嘅蘭桂坊選民出頭，與警署交涉。其次就係打電話畀政府好睇重嘅蘭桂坊之父盛智文，呢位阿Sir可以直接打電話搵最高當局㗎。最後咪搵埋新官上任嘅旅發局主席田北俊少爺囉！
三位美國遊客來自LA，左丁山問佢哋：「周末係UCLA四強決賽之期，點解你哋唔留番喺LA睇波？」其中一位女士係UCLA校友，佢話：「我哋更鍾意欖球，事實上，舊年訂機票、酒店來港之時，點會預測到UCLA會咁醒打入四強（FinalFour）吖。此文見報之時，大家已知道誰勝誰負（編按：UCLA輸咗畀佛羅里達）。呢幾位朋友住在港麗酒店，有特別優惠，就係房租只比平時價錢加四分一啫，有房畀佢哋，已算夠運！