高達模型、扭蛋，今日香港所見玩具，有邊樣唔係日本嘢？雖然麻木接受，但香港真係冇屬於自己嘅出品？滄海遺珠，喺旺角兆萬有伍先生，06年推出咗「香港無印美食」，係兩套以茶餐廳和囍宴為題的食玩，結果在香港受歡迎，仲成功打番入食玩文化發源地日本。見反應理想，伍先生正打算喺5月推出點心系列。《蘋果》今次就搵嚟嚼江南的點心師傅居靜波，品評一下最新貨辦。
記者︰陸俊雄
攝影︰陳陶鈞、何家亮
讚叉燒酥 彈叉燒包
要評點心食玩，最佳人選當然係點心師傅啦。今次就搵來入廚已有30年經驗，現為嚼江南蘇杭上海菜館的點心師傅居靜波來品評。居師傅近年專做花式點心，但對於點心食玩，可謂第一次接觸，拿在手上把玩着十分好奇，佢話：「叉燒酥個皮做得最似，色澤又夠。」其次佢覺得春卷和馬拉糕質感都做得好真。不過有讚亦有彈，居師傅話叉燒包上，露出叉燒料的邊皮，應該要裂開三瓣而唔係得一瓣！（小記就兩瓣都食過。）至於蝦餃和粉果，佢認為始終做得唔夠晶瑩通透，佢臨返回工作崗位前仲補句：「咁細件，我怕畀小朋友食咗！」師傅宅心仁厚。其實買食玩嘅收藏者大都係成年人，純粹用作裝飾擺設用。
做點心因為冇版權
繼香港茶餐廳和囍宴成功打入日本市場後，第3彈點心系列定於5月推出。奇怪伍先生對食物是否有種情意結，點解唔試吓貓貓狗狗？「做食物唔存在版權問題，而且我係睇見日本仔推出好多關於香港特色美食嘅旅遊書，覺得有市場。」既然冇版權，伍先生亦擔心有人偷橋，早佢一步推出點心食玩。今次同囍宴系列一樣，都係一套12款，零售價亦保持$220一套左右，伍先生話：「市場反應話我知，高過呢個價錢去唔到貨。」現時大家睇到嘅係貨辦，仍未生產，伍先生話暫時見得大家嘅只有10款，而仲有一架尚未曝光嘅點心車，等收藏家可以一併將點心放上去，聽落幾過癮。
搵料過程勁搞笑
做一個系列食玩成本約$50/套，零售價為$220，每系列投資近百萬，利潤約30萬。咁大製作，以為佢有班智囊團坐低商量，但佢坦言：「冇㗎！由頭到尾都係自己度，決定咗就同幾個朋友去酒樓食餐勁。」伍先生仲爆料，囍宴、點心都係去美X酒樓叫到成枱都係，跟住先影相，帶埋電腦過相即睇，冇問題先開餐。「點心易解決啫，囍宴就大鑊，叫一圍3個人食唔晒，結果每人打包幾袋拎走。」茶餐廳系列仲抵死，佢去廟街一間有名茶餐廳：「個老闆娘好識搵錢，平時想借場影相會收錢，佢見我起勢對住塊西多士影相，佢問我用嚟做咩，結果我扮阿Sir話影返去俾學生睇！」
第一彈 茶餐廳
早已賣斷市，生產2萬套，3個月賣清，港日售貨比例各佔一半，但伍先生大喊實情唔賺得多，因為第一次打入日本市場俾人壓價。
第二彈 囍宴$220
第二彈醒咗，囍宴同多間公司合作，變相賺多少少。伍先生︰「生產萬六套左右，單係香港賣出約3,000套。」而港日售貨比例7對3。「囍宴都係上年12月推出，聽落反應唔錯，不過最終係咪賺錢，其實要等半年至9個月先計到數。要等咁耐，好多人會諗不如拎啲錢去抽新股仲好賺。」
同場加映：近期熱賣食玩
茶餐廳冇喇！囍宴又買咗，咁近期仲有冇其他食玩熱賣？梗係有，以下就有幾個好介紹。
第一位──可樂食玩
7仔之前推出過，買可樂換購便利店微型食玩，全部都係7仔內買到嘅食物，如熱狗、珍寶腸等，一套8款，另再有兩個雪櫃畀你放食玩。咁得意，一個朝早就冇晒，𠵱家買要用炒價兼無得散買。
第二位──Snoopy火鍋
Snoopy最近推出咗一款新食玩，有火鍋、拉麵和便當等，一套12款，分6款紅色底、另6款則粉紅色底，Fans唔好錯過。
第三位──Re-Menrt士多啤梨屋
伍先生話齋，買食玩係女仔玩多果然冇錯，好似日本Re-Menrt新出嘅士多啤梨屋，蛋糕、梳妝台等一套10款全部以女士最愛的士多啤梨做主題。
