各大聯賽已到咗尾聲，我求大俠眼見多支傳統球會正陷降班漩渦，好似畢爾包咁，周日作客桑坦德合演今季經典戰役，全場炮製9個入球，最後輸埋4:5爆個100倍波膽，𠵱家排緊尾3，護級形勢險峻。
我求大俠不嬲好欣賞畢爾包呢隊波，堅持傳統淨係搵西班牙本土球員打聯賽，咁多年都冇變過。原來除咗巴塞同皇馬之外，𠵱家淨番畢爾包未降過班；不過佢哋今季咁頹排緊18位，你都咪話冇機會打破歷史。
畢爾包周日作客桑坦德好有機會全取3分，半場仲有1球領先優勢，點知下半場桑坦德發晒茅，單計前鋒施積已經連中三元，搞到畢爾包輸埋4:5，創出全季西甲入波最多場次，連21倍半全場「客/主」爆出嚟；買咗桑坦德W嘅球迷，等同坐咗十幾次過山車一樣驚險。
聖日耳門多蒙特未脫險
西甲傳統隊畢爾包今季好頹，原來隔籬聯賽都有唔少傳統勁旅踢得好差。德甲多蒙特排緊尾2、法甲巴黎聖日耳門排尾4，睇嚟今季啲傳統強隊認真濕滯，隨時喺季尾見到佢哋全部降班，大開球迷眼界。