金融風暴沒有傷他分毫，沙士也影響不到他的生計，過去十年，香港紛紛擾擾，無阻他在中環街頭開展新生活。經歷過70年代股巿狂潮，輸了兩層樓及一輛跑車，由在文華酒店頂樓用膳，到97年開始蹲在街頭擦鞋，張惠明見證了男士皮鞋從千多元的Bally，過渡到今日過萬蚊的JohnLobb，際此股市風急浪高之時，他勸勉後輩之餘也自勉，事事隨緣，減少執着，「得未必好，失亦唔一定係壞。」 記者:張嘉雯
中環的擦鞋檔很多，戲院里滙豐銀行門口就有幾家，紳士淑女平民OL提起小腿，擦鞋匠就拿着棉布，在皮鞋上擦呀擦，每對盛惠20元，但聽到記者來採訪，他們即時變臉，「過主呀！過主呀！」
張惠明不一樣，他的檔在畢打里地鐵出口對開，他說起話來溫文爾雅，皮鞋名牌的英語、法語發音，V音、S音絕不遺漏。平日客人光顧，可以舒舒服服坐在椅上，看他細心抹去鞋上的微塵，再用同色鞋油抹得光亮無瑕。單是看，已是一種享受。
股災慘輸了兩層樓
腳踏黑色adidas波鞋的張惠明，本來就不平凡。1972年，張惠明在理工大學修畢建築系文憑，股巿大旺，他跑到金銀證券交易所任出巿代表，在康樂大廈上班，每日３小時，年少得志，錢多得花不完，索性一年三分二時間去旅行。翌年，他大手買入合和及新地各一萬股，結果遇上大跌巿，血本無歸。回頭話當年，今日的他已經56歲。
70年代股災，讓他輸了銅鑼灣和灣仔兩個價值40萬的單位，還有六萬元的跑車，其後他轉任工程監督，直至97年公司倒閉。
「幾廿歲人，有過又冇過，以前炒股票，喺文華頂樓食飯，𠵱家踎喺街邊擦鞋，又如何？初初都覺得難受，後來發現根本無人注意，在意嘅都係自己啫。」1997年，張惠明在友人介紹下開展擦鞋匠的生活，每對鞋收費20元，每日擦10至20對，高峯期30多對，「20蚊對，有人話貴，有人話平，可以食餐飯囉，十年，生意無話大上大落。」
女士較以往愛擦鞋
「沙士嘅時候，啲人為咗健康，少咗留喺街，但係都冇乜影響生意；就算股票跌，經濟唔好，啲人亦都唔會為咗慳20蚊而擦少啲鞋，有錢嘅，又唔會擦多次，鞋油嘅價錢又冇乜點升，收入冇乜點影響。」
十年來最大改變，是香港男士越來越懂得穿靚鞋，由千多元的Bally、RalphLauren、YvesSaintLaurent；二、三千元的LouisVuitton、SalvatoreFerragamo；四、五千元的Church's，到逾萬元一對的JohnLobb、EdwardGreen、J.M.Weston，「經濟好咗，啲人識着，過萬蚊對鞋都會買。」
他又說，現在的客人經常突然失蹤，「做生意嘅成日周圍走，原來去咗北京或者返咗大陸做嘢，做親幾個月，呢幾年香港少咗外國公司，通常淨係得番個辦事處喺度，人手就減少到得十分一，外籍客人都少咗。」但相比過往，女士擦鞋的比例較以往多，「因為女人啲鞋貴咗，啲人又知道啲鞋要保養。」
待在中環街頭，張惠明也見證打工仔的工作壓力，「有啲人好鍾意擦鞋，擦鞋嘅錢加加埋埋可能貴過對鞋，一個禮拜嚟兩次，對鞋少少污糟都唔開心，經過就行埋嚟坐吓，覺得對鞋亁淨返就開心啲，其實係做嘢辛苦，想落嚟唞一唞，靜一靜。」
由殖民地到特區，這位擦鞋匠覺得「世界大變」，「英國政府，有自己一套，管理上做得好；但係未來十年，就唔係香港人話事嘅，特首都係掛名嘅啫，話唔到事。經濟表面上係好咗，但係咁樣冇用㗎喎，香港貧富懸殊距離越嚟越遠，有錢佬身家以億計，打工仔一個月咪多嗰兩、三百蚊，香港人𠵱家唔同咗。」
「特首都係掛名啫」
他勸勉後輩不要太執着，要隨緣，「唔好自信太強，又唔好睇低自己；唔好目標太高，話要幾時賺第一桶金咁，把口噏就容易，背後要付出好多努力，以前唔明，𠵱家覺得事事要隨緣，樣樣嘢唔好咁執着，得未必好，失亦唔一定係壞，個人就會過得安樂啲。」
回歸10年倒數88日