自一記施丹頭槌，小記認識到球場上任何綠茵英雄都只係茅躉王。但估唔到坐喺屋企捱眼瞓，邊咬薯片、邊飲汽水嘅波友，仲茅！呢排有線、NowTV為咗個足球頻道鬥個你死我活，而球賽直播權喺兩個台轉到暈，但𠵱家正值歐聯戲肉之際，好多波友話唔想煩，一個唔該Click上網睇所謂網上電視，搞到已銷聲匿迹一段日子嘅PPLive、PPStream又死灰復燃。波友呻住咁話：「𠵱家屋企又冇得睇、落街又冇得睇，我都係焗住咋！」
記者：陳國輝
攝影：伍慶泉
Model：Edmond、Chimpy
落Bar冇得睇上網太方便
「四至五月呢段日子，係最緊張嘅關頭！」波友話，就算平時唔係點睇，但一進入歐聯8強賽事，或者英超、西甲、意甲聯賽季尾，就肯定係最精采、最刺激。「我明知上網睇波唔啱，但係冇計！以前間間Bar都裝有線，幾乎乜球賽都可以睇，但𠵱家歐聯呢類超級大賽改晒NowTV直播，到下季連我至愛嘅英超都轉埋過去，據講有好多酒吧都未裝NowTV，咁我惟有返屋企上網睇住先啦！」有波友仲抵死，竟然拎住部Notebook成班人落Cafe圍住上網睇，貪嗰度裝咗WiFi，上網睇又快又方便，唔怕嘈到屋企人！
畫質差起晒格有Delay
咪諗住上網睇波好容易，其實有苦自己知。波友話：「睇PPLive事前要裝佢個Software落電腦，每次都要等佢撈成幾分鐘，少啲耐性都唔得！」但講到最難容忍，相信係畫質方面，串流技術嘅原意係一邊撈、一邊睇，由於容量唔大兼畫質低解像，所以用3G手機睇還可以，但上到十幾吋電腦芒，就馬上變得全無質素可言：一嚟球星個樣好難認得出；二嚟經常窒格，好唔流暢；三嚟睇睇吓預咗會斷線。仲有另一個問題，其實上網睇波係會出現幾分鐘Delay，如果你玩開即場投注，肯定輸到你癲！
畫面比拼
上網睇電視StepByStep
1.上有關網站裝Software落電腦。
2.大概5-10分鐘就會完成。
3.Click入去電視節目選單就睇到。
球迷推介：網上電視「熱」頻道
PPLive 新Web版直睇
最多人用嘅網上電視頻道，特設一項唔使裝Software嘅方法，Click入去即睇波，但畫面質素參差。
http://www.pplive.com/
PPStream 系統穩定回勇
元祖級網上電視頻道，但需安裝軟件睇，加上窒格問題嚴重，曾一度被人放棄；最近少咗人上，系統穩定番，可以一睇！
http://www.ppstream.com/
TVAnts 睇盡中日韓電視
中港台、日、韓節目都有，網頁上會顯示當時嘅Online人數、影片質量以及寬帶速度，資料鬼咁詳盡。
http://cache.tvants.com/
球迷：睇波最緊要夠貼！
Edmond：「睇波梗係成班人先最過癮，你叫我自己匿喺間房睇網上電視，仲要睇波，冇得同朋友傾一定悶死。」
Rex：「我曾經都用過PPLive睇卡通片，不過用嚟睇波真係接受唔到，因為畫面經常窒吓窒吓，睇得一啲都唔爽。」
