九巴後人雷兆光的太太雷林靜怡上周剖腹誕下第三胎，一如所願，生下六磅多女兒，組成一個五口之家。雷林靜怡開刀時，因身子太虛弱，事後要輸三包血，不過有仔女萬事足的她，揚言見到囡囡已忘憂，母愛真偉大！
恭喜！恭喜！九巴後人雷兆光的太太雷林靜怡上周順利誕下六磅多女嬰，為長子二女添一個妹妹。原定預產期為今個月，雷林靜怡與丈夫雷兆光搵師傅揀好日子，在3月27日開刀剖腹產女，她昨日在電話中說：「今次都幾辛苦，我開刀但就流咗好多血，生完之後要即刻輸血，輸咗三包血，所以身體都好虛弱，成日個人都好攰。」
老公好心痛
雷林靜怡懷孕後，曾公開表示陀得比前兩胎辛苦，每晚只能睡四、五小時，問她可是身體太差所致？她說：「醫生話原因係好複雜，咁始終生仔都係有危險。James（指丈夫）都有陪我入產房，佢都好心痛但又唔想嚇我，只係全程安慰我。自己生過兩個都冇乜事，一直諗住係第三胎都OK，點知可能係個胎陀得低啲，又緊張大仔同囡囡，所以比較辛苦，平時產婦臨生都會重25-30磅，我今次只係肥咗20磅，都係輕咗啲。」
飲雞湯補身
雖然身體虛弱又辛苦，但雷林靜怡揚言一見女兒就忘憂，她說：「BB好白，好似之前個女咁，眼大大嘴細細，又幾靜。中文名未改，睇吓嫲嫲意思啦，英文名就會用番J字頭，我哋全家都係J字，咁一家五口都係一樣。」雷林靜怡現時飲雞湯補身，問她可會再追？她說：「我都好鍾意細路，有仔女萬事足，唔介意再生，但暫時stop住先。」
採訪：DebbieLum
