記得細細個嗰陣，每日都搭豐田小巴返學，感情深厚如老友記。喺過去呢10年，我呢位老友記更已榮登汽車界產量最高嘅一哥！至於小記，依然係個人工奀奀嘅打工仔，點解我老友咁掂而我就咁霉？小記特登踩上代理豐田嘅皇冠車行，尋找豐田攀上一哥地位嘅成功之道。
「豐田成功關我鬼事？我又無買佢股票！」假如你咁諗就肯定無發達，皆因豐田獨門秘方「閉門造車」完全可應用喺打工仔身上，助你平步青雲！
記者：周達之
攝影：陳陶鈞
Model：Fion
形容豐田閉門造車，全因佢懶理世界各大企業嘅管理論調，反晒傳統冇自己一套，而且仲相當騎呢㖭！最多人熟悉嘅係即時化生產（JustinTime）——沒有一件要用的零件在被需要用前就做好，以及錢不應該花在存貨及倉儲上。簡單講即係生產流程要配合得天衣無縫，唔可以堆積零件庫存。呢個理念雖可作為生產嘅金科玉律，之但係如小記呢類打工仔嚟講，呢個理念又可以應用得上咩？原來係可以嘅！
李先生話：「JustinTime一般被理解為減少庫存，但當中其實隱藏住一個重要理念。喺生產流程當中，之所以有庫存，係因為生產流程唔穩定，有人怕生產線出現問題而缺貨，於是諗出存貨嘅方法嚟應付不時之需。但豐田嘅概念就認為，如果生產上出現問題，唔應該用庫存嚟掩蓋呢個問題，而係應該將問題暴露出嚟、俗啲講就係谷爆個問題，然後將佢解決！千祈唔好遮蓋問題，因為遮蓋問題所花嘅人力、資源同時間其實比面對問題仲要多！」
執行董事踩落車場
第二個成功理念就係「實地現場堪察了解」，即係叫大家唔好淨係坐喺寫字樓工作，即使係身為執行董事嘅李先生，亦經常走去元朗嘅車場巡視，親身發掘問題，李先生話：「假如唔親身到工作現場，你永遠無可能了解實際狀況，連問題都未發現到，更加唔會有解決嘅方案，亦唔能夠喺重要嘅時刻向老細表現你嘅工作能力。」
「正因為唔可以再用庫存嚟掩蓋問題，所以迫住公司上上下下去改善生產、改善問題，令到豐田嘅製造成本、速度同質量都能夠做到咁好！將呢個理念應用喺一般打工仔身上，即係話叫大家唔好遮掩自己嘅缺點，要去承認自己嘅缺點，俗語即係唔好死撐！因為越係死撐嘅人就越係無進步！」
造車亦造人
「Wedon'tjustbuildcars,wealsobuildpeople.」呢句世界知名嘅豐田口號就係第三個成功因素，李先生表示，無論係作為管理階層，還是作為團體嘅一員，每個人都應該尊重他人，同時亦要發揮他人嘅長處，咁樣先至可以令工作做得更好！
司機大佬讚佢襟捱
喺香港，豐田生產嘅的士、小巴及Van仔差不多佔市場九成以上，對於一班日揸夜揸豐田車搵食嘅司機大佬，又點睇呢？
蕭先生
「呢部豐田小巴幾好揸，行起嚟好暢順，亦都好少壞，搵食車最緊要係襟用，壞一日車就做少一日生意。」
阮先生
「呢部的士我揸咗7年，一直都幾好，無乜點大修過，而且豐田零件多，要修理都好方便。」
嚴先生
「呢部豐田HIACE我揸咗四年，同行好多都係用豐田車，因為貪佢耐用，下次再買車我都會買豐田。」
豐田3系猛將
豐田得以登上一哥寶座，全靠一系列受歡迎車種，而當中嘅Corolla、Lexus，以及Prius更可以話係豐田嘅三系猛將，缺少其一，豐田都無可能有今日嘅成就！
Lexus 鍊贏歐美豪房
凌志品牌於89年喺美國成立，以周到客戶服務同高品質贏得北美市場極高評價，現已躋身美國頂尖品牌，03年更反輸入回日本。凌志可算豐田開拓高檔汽車市場嘅最重要車種。
Corolla 真正平靚正
1966誕生嘅Corolla掀起咗平民汽車熱潮，由日本以至全世界均大受歡迎，差不多成為咗豐田嘅代名詞。豐田官方網站所記載嘅資料表示，Corolla至今全球銷量已達三千萬架！
Prius 環保車之父
面對石油價格同環保意識高漲，豐田已把重任交託喺97年推出嘅混能汽車Prius身上。豐田投入鉅額資源發展混能技術，取得專利多達350項，連福特亦要向其購買相關技術。
終極成功因素
除咗企業理念令豐田得以奪取世界第一之外，以下數個例子亦充份反映出豐田文化嘅終極境界，相信各位睇完之後都會大感驚歎！
1.變姓為夠響
豐田公司係以日本豐田家族嘅姓氏嚟命名，「豐田」嘅日文發音係「Toyoda」，之所以改成「Toyota」，原來係為咗發音響亮啲好聽啲，對公司嘅發展有利啲咁話喎。為咗公司形象連姓氏都可以改，有乜法子唔成功！
2.六親不認
正所謂肥水不流別人田，一間公司採購零件當然先揀同一集團嘅出品，不過豐田06年生產嘅Corolla，錶板定單居然外判畀人而非附屬公司Denso，理由係人哋產品更好！豐田連子公司都踢開，呢種六親不認嘅至高境界，你又學唔學得到？
3.唔睇學歷睇身高
豐田附屬公司Denso為提升生產效率，無所不用其極，喺泰國嘅生產線僱用嘅女工，高度要求居然清一色155cm！因為廠方做過模擬生產實驗，發覺女工身高偏差太多，會產生「無附加價值」嘅動作，影響生產線嘅流暢度，點到你唔服？
