時間：98年12月2日
地點：深井陳記
人物：劉以達和太太冼美珍
經過：達明一派成員劉以達一向俾人感覺另類，就連婚禮都唔例外，實行以最低消費，力證兩人情比金堅，而唔係金錢嘅奴隸。
阿達98年突然決定結束寡佬生涯，同拍拖僅一年嘅女友冼美珍拉埋天窗，當年阿達開創娛樂圈新低點，以888蚊開門利是接新娘，婚宴方面仲慳皮，兩公婆捨棄大酒店排場，改為喺好友位於深井嗰間酒樓舉行別出心裁嘅燒鵝宴，擺五圍招呼至親，其中兩席仲係齋宴。
老婆冇要求
據講當晚嘅菜式有海參鵝掌同咕嚕雞球，埋單唔使4,000蚊，真係抵玩！阿達當年接受訪問時話：「我哋雙方家長都想低調啲，老婆又冇特別要求，所以婚禮咪從簡。」
愛情路上阿達同老婆並肩而行，音樂路上同拍檔黃耀明就分道揚鑣。舊年阿達出嚟力數明哥，仲同內地新人李璐璐組成「達與璐」出唱片，不過反應就唔係咁理想。阿達近排受訪時大爆當日鬧明哥係受前經理人陳海琪唆擺，所以先搞到二人擘面，睇嚟佢好似好後悔，莫非諗住食回頭草？
本欄逢周一至周六刊出