天星碼頭之後，又話保存皇后碼頭，講共同回憶。左丁山對皇后碼頭就冇乜回憶咯，只記得咁多年來，曾經在皇后碼頭上落遊艇兩三次，但因為左丁山怕暈船浪，唔係好鍾意遊河，已經好耐好耐冇去過皇后碼頭，故此無甚記憶。至於以前啲港督來港履新，在皇后碼頭上岸一事，最近最近一次已經係一九九二年彭定康到港，左丁山幾乎唔記得咗。講共同回憶，左丁山最記得嘅公眾地方就係啓德機場，咪又拆咗！
回憶係好私人嘅一回事，呢日睇新聞，知道陸海通大廈將於年底拆卸，改建成甲級寫字樓，不禁大叫可惜，幾乎想去搞示威，保護「舊文物」。小記者G聽到，問左丁山：「陸海通大廈喺邊度，點解要保留？」左丁山答：「聽過皇后戲院未？」小G話：「去睇過一次戲，冇去好耐，幾乎唔記得咯，香港啲戲院成日拆嘅啦，拆皇后戲院有乜稀奇。」咪係囉，所謂共同回憶係好個人化嘅，左丁山對皇后戲院有感情啫，小G當佢冇到。
陸海通大廈拆後，皇后戲院不復存在，於是昔年中環兩大戲院「皇后」、「娛樂」都冇晒，以後睇戲只好去IFC。好難講嘅，據報陸海通大廈現時每月呎租係二十至三十元之間，改建後可收六七十蚊，係業主都想改建啦。現時皇后大道中最新大廈YorkHouse收租近一百三十元，IFC去到一百五十元，普通公司好難頂，聽講安永會計師事務所搬入IFC二期後，風水甚好，生意多到做唔切，點知時間飛逝，眨吓眼就要講新租約。一位資深會計師對左丁山講：「我哋呢行無論生意點好，都難以負擔呎租一百元以上！」安永係大租客，搵幾萬呎新寫字樓唔係容易，睇怕想搬走都會好傷腦筋。
行過舊文華酒店，就係聖佐治大廈。一位老友嘅寶號設於聖佐治樓上，最近加租至每呎八十元，老友牙痛咁聲。冇得講啦，獵頭大公司RussellReynolds設於中滙大廈，因租金急升，一樣要搬。會計師、大律師都同左丁山講：「我哋專業人士係為業主打工嘅！」