繼英格蘭「萬人迷」碧咸之後，墨西哥「夾波王」白蘭高亦會去美國踢波，簽約加盟芝加哥火燄，令到美國職業足球大聯盟再多粒星睇吓。
前日先講緊「3間牌」想同已掛靴法國球王施丹打人情牌，力邀佢出山加盟洛杉磯銀河同碧咸做隊友，呢單嘢仲未成事，白蘭高就喺噚日簽咗芝加哥火燄，仲會喺6月正式喺美國獻技；而呢位34歲前鋒更誇下海口，話可以幫火燄攞聯賽冠軍，直頭當碧咸冇到。
美職聯不嬲唔係頂級球員考慮踢波嘅地方，但自碧咸喺1月同洛杉磯銀河簽約5年，令到呢個水準介乎英冠同英甲嘅聯賽吸引力大增。「肥哨」朗拿度離開皇馬喺轉投AC米蘭之前，就盛傳佢會過檔紐約紅牛；早排亦傳過利物浦嘅英格蘭前鋒科拿會去美國搵食，加盟由利物浦名宿尼高領軍嘅新英倫革命；近排嘅主角就係效力格拉斯哥流浪嘅克羅地亞前鋒柏素，聽講佢同洛杉磯銀河斟緊。
記得在7、80年代美國同加拿大將北美足球聯賽搞得有聲有色，比利、碧根鮑華、告魯夫同卜比摩亞等名宿都踢過。我求大俠認為，美職聯想搞起似乎有難度，但多幾個球星充撐吓，對賽事同球迷都肯定係好事。